Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 397 Hüküm no: 419 Orijinal metin no: [90b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim b. Hacı Yusuf’un yeni vasîsinin eski vasînin zimmetini ibrâ etmesi Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Evlice Baba mahallesinde sâkin iken bundan akdem vefât eden el-Hâc Yusuf nâm müteveffânın sulbî sagīr oğlu İbrahim’in tesviye-i umûru için kıbel-i şer‘-i şerîfden mansûb vasî olan Mustafa Çelebi b. Hüdâverdi meclis-i şer‘de bundan akdem sagīr-i mezbûrun vasîsi olup sagīr-i mezbûrun malını zabt ve her hâlini hıfzda taksîr ve tekâsülü olmağla azl olunan bâ‘isü’l-kitâb Mehmed Çelebi b. Musli nâm râcil mahzarında bi’l-vesâye ikrâr ve takrîr-i kelâm edip mezbûr Mehmed Çelebi bundan akdem vesâyet-i mezkûreden azl ve yerine ben vasî olduğumda, mezbûr Mehmed Çelebi sagīr-i mezbûra babası müteveffâ-yı mezbûrdan bi’l-irsi’ş-şer‘î isâbet ve intikāl edip sâbıkan sagīr-i mezbûr üzerine vasî olan el-Hâc Halil’den ahz ü kabz eylediği malın muhâsebesini gördüğümde ber mûceb-i defter bi’t-tamâm ve’l-kemâl vasiyy-i sâbık-ı mezbûr Mehmed Çelebi yedinden vesâyetim hasebiyle alıp kabz [edip] zimmetinde sagīr-i mezbûr malından bir akçe ve bir habbe bâkī kalmamışdır min ba‘d vasiyy-i sâbık-ı mezbûr Mehmed Çelebi ile sagīr-i mezbûr malına müte‘allik da‘vâ ve nizâ‘ım yokdur deyicek gıbbe’t-tasdîki’ş-şer‘iyyi’l-mu‘teber mâ hüve’l-vâki‘ bi’t-taleb kayd şüd. Tahrîren fi’l-yevmi’l-hâmis aşer min Zilhicceti’l-harâm li seneti isneteyn ve seb‘în ve elf. Şuhûdü’l-hâl: El-Hâc Ali en-Nâzır, el-Hâc Ali [b.] Tayyib, Sâlih Efendi b. Mehmed, Hüseyin Muhzır, Ali Beşe Çukadâr ve gayruhüm mine’l-hâzırîn.