Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 398 Hüküm no: 420 Orijinal metin no: [90b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim b. Hacı Yusuf üzerine Mustafa Çelebi b. Hüdâverdi’nin vasî tayin olunması Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Evlice Baba mahallesinde sâkin iken bundan akdem vefât eden el-Hâc Yusuf’un sulbî sagīr oğlu İbrahim’e babası müteveffâ-yı mezbûrdan intikāl eden malı zabt ve sagīr-i mezbûrun her hâlini hıfz için kıbel-i şer‘den mukaddemâ vasî nasb ve ta‘yîn olunan el-Hâc Halil b. Maden nâm bezzâz ticâret için diyâr-ı âhara müteveccih olmağla kendi azlini ilhâh ve iltimâs etmeğin azl olunup sagīr-i mezbûr üzerine cânib-i şerî‘at-ı mutahharadan Mehmed Çelebi b. Musli vasî nasb ve ta‘yîn olunmuşdu, lâkin mezbûr Mehmed Çelebi dahi mâl-ı sagīri zabt ve her hâlini hıfzda tekâsül ve tehâvün üzre olduğundan mâ‘adâ te‘addîsiyle yedinde sagīr-i mezbûrun malı zâyi‘ ve telef olduğu takdîrce tazmîn için ism-i mâl ıtlâk olunur bir nesnesi olmamağla sagīr-i mezbûrun malı aynıyla mevcûd iken mezbûr Mehmed Çelebi azl ve yerine bir mütemevvil ve dindâr kimesne vasî nasb ve ta‘yîn olunmak sagīre her vechile evlâ ve enfa‘ olmağın işbu sâhibü’l-kitâb Mustafa Çelebi b. Hüdâverdi her vechile mahal ve müstahık vesâyet uhdesinden gelmeğe kādir ve mütemevvil ve perhîzkâr olup vesâyete ehil olmağla sagīr-i mezbûr üzerine hâkim-i muvakki‘-i sadr-ı kitâb tûbâ-lehû ve hüsnü me’âb hazretleri dahi vasî nasb ve ta‘yîn etmeğin ol dahi vesâyet-i mezbûreyi kabûl ve hıdemât-ı lâzımesini edâya müte‘ahhid olmağın vâki‘ü’l-hâli bi’l-ibtigā sebt olundu. Fi’l-yevmi’r-râbi‘ aşer min Zilhicceti’l-harâm min şühûri sene isneteyn ve seb‘în ve elf. Şuhûdü’l-hâl: Mustafa Çelebi b. Pervâne, Sâlih Mehmed Efendi b. Mehmed, Ali Beşe b. Emrullah, Hüseyin Muhzır, Hasan muhzır ve gayruhüm mine’l-hâzırîn.