Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 314 Hüküm no: 354 Orijinal metin no: [47b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Ağa b. Hasan’ın evi önüne yapılan tahta perdenin damlalığına zarar verdiği, tahta perdenin ön kısmından on iki parmaklık kısmının kesilmesi gerektiği Husûs-ı âti’l-beyânı mahallinde istimâ‘ ve tahrîr için gıbbe’l-iltimâs kıbel-i şer‘-i mutahhardan bu fakīr ve hâssa mi‘mârlardan üstâd el-Hâc Hasan b. Ömer ve üstâd Mustafa b. Ali ve zeyl-i vesîkada muharrerü’l-esâmî olan müslimîn ile mahmiye-i İstanbul’da Kabasakal Sinan Ağa mahallesinde vâki‘ zikri âtî damlalık arsasının üzerine varıp akd-i meclis-i şer‘-i şerîf olundukda mahalle-i mezbûrede vâki‘ merhûm Kasım Çavuş[’un] vakf eylediği sekiz bâb müte’ehhilîn odalarının icâre-i mu‘accele ve müeccele-i ma‘lûmeteyn ile müste’ciri olanlardan işbu bâ‘iseyi’l-vesîka Mustafa Halîfe b. Abdullah el-Müezzin ve Kalaycı Şaban b. İbrahim nâm kimesneler kendi taraflarından asâleten ve çiçekçi Hüseyin Bey tarafından husûs-ı âti’l-beyâna sâbitü’l-vekâle vekîlleri olmağla vekâleten vakf-ı mezbûr mütevellîsi tarafından kāimmakām-ı mütevellî olan fahrü’l-akrân Mustafa Ağa [48a] b. Ali huzûrunda meclis-i ma‘kūd-ı mezbûrda vakf-ı mezbûr damlalığına muttasıl merhûm Yahya Efendi nâm sâhibü’l-hayrın vakfından olup icâre-i mu‘accele ve müeccele-i ma‘lûmeteyn ile bir bâb menzilin mutasarrıfı olan fahrü’l-a‘yân Mustafa Ağa b. Hasan ile vakf-ı mezbûra kāimmakām-ı mütevellî olan İbrahim Efendi b. Süleyman muvâcehelerinde her biri takrîr-i kelâm edip kadîmü’l-eyyâmdan bu âna gelince bizim tasarrufumuzda olan menzillerimizin temelleri kâfiri binâ olup önünde vâki‘ damlalık arsasının nısfı bizim tasarrufumuzda olan mezbûr Kasım Çavuş vakfı’nın ve nısf-ı âharı mezbûr Mustafa Ağa’nın tasarrufunda olan mezbûr Yahya Efendi vakfı’nın damlalığı olup ol kâfiri binânın üzerlerinde kadîmden bizim tahta bendlerimiz olup ol tahta-bendler ta‘mîre muhtâc olmağla üslûb-ı sâbık üzre ta‘mîr eylediğimizde mezbûr Mustafa Ağa siz tahta-bendlerinizi ziyâde tecâvüz edip benim tasarrufumda olan sakfımın saçağı üzerine uzatmağla ve önlerine dahi tahta perde tutmağla bana havâle ve zararı vardır deyû bizi rencîdeden hâlî değildir, hâlâ muvâcehesinde ba‘de’n-nazar bî-vech ta‘arruzdan men‘ olunması matlûbumuzdur dediklerinde mi‘mârân-ı mezbûrân zikr olunan tahta-bendlere nazar eylediklerinde fi’l-vâki‘ kadîmden olan tahta-bendlerden arzen on ikişer parmak merkūmûn Mustafa Halîfe ve Kalaycı Şaban ve çiçekçi Hüseyin Bey tecâvüz edip ve önlerinde tahta havâle perdeleri olmamağla merkūmûnun mezbûr Mustafa Ağa’ya zararları vardır, zikr olunan tahta-bendlerden arzen on ikişer parmak mikdârı kat‘ edip ve ol tahta-bendlerin önlerinde havâle perdeleri tutmağla mezbûr Mustafa Ağa’nın havâle ve zararı def‘ olur deyû mi‘mârân-ı mezbûrân ve sâir ehl-i vukūf icmâ‘ ve ittifâk eylediklerinden sonra ol zararı def‘a merkūmûna tenbîh birle mâ hüve’l-vâki‘ bi’t-taleb ketb olundu. Fi’l-yevmi’r-râbi‘ ve’l-ışrîn min Cumâdelâhire li sene seb‘a ve seb‘în ve elf. Şuhûdü’l-hâl: Mustafa b. Abdullah, Zülfikār b. Abdullah, Osman b. Abdullah, Receb b. İbrahim, Şaban b. İbrahim, el-Hâc Mustafa b. Hasan, İbrahim Efendi b. ( ) el-İmâm, el-Hâc Ahmed b. ( ), el-Hâc Abdülbâkī b. ( ) Helvacı, Sâ‘atçi Ebûbekir Ağa b. ( ), İbrahim b. Murad, Kenan b. Abdullah, Mehmed Halîfe b. Mehmed, Hasan Beşe b. ( ) el-Hayyât.