Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 315 Hüküm no: 355 Orijinal metin no: [48a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Panoli bt. Kalov’un, Manol v. Petro’dan kendisine takdir edilen nafaka bedelini tahsil ettiği Vilâyet-i Rumeli’nde kasaba-i Çorlu’da Papas mahallesinde sâkine Panoli bt. Kalov nâm nasrâniyenin sulbî oğlu ve tarafından husûs-ı âti’l-beyâna sâbitü’l-vekâle vekîli olan Nikola v. Petro nâm zimmî meclis-i şer‘de li ebeveyn karındaşı işbu bâ‘isü’s-sifr Manol v. Petro nâm zimmî muvâcehesinde bi’l-vekâle ikrâr ve takrîr-i kelâm edip vâlidem müvekkile-i mezbûre Panoli’nin karındaşım merkūm Manol üzerine mukaddemâ hâkimü’ş-şer‘ takdîr ettirdiği yevmî altışar akçe nafaka-i mefrûzasından işbu bin yetmiş yedi Saferi gurresinden sene-i mezbûre Receb’i gurresine gelince beş ayda zimmetinde müctemi‘ olan dokuz yüz akçeyi hâlâ karındaşım merkūm Manol yedinden vekâletim hasebiyle bi’t-tamâm ahz u kabz eyledim dedikde gıbbe’t-tasdîki’l-mu‘teber mâ vaka‘a bi’t-taleb ketb olundu. Fi’l-yevmi’s-sânî min Recebi’l-ferd li sene seb‘a ve seb‘în ve elf. Şuhûdü’l-hâl: Hüseyin b. Rüstem, üstâd Süleyman b. Ahmed, Veli b. Fethi, İbrahim b. İlyas, Ahmed Efendi b. ( ), Gazanfer b. Tevekkül, Mehmed b. Ramazan, Resul b. Rıdvan.