Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 402 Hüküm no: 425 Orijinal metin no: [91b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bedehşan bt. Abdullah’ın câriyesini kaybettirdiği iddiasıyla Sâliha bt. Derviş Mehmed aleyhine açtığı davada sulh olması Mahmiye-i İstanbul’da Sinan Ağa mahallesinde sâkine Bedehşan bt. Abdullah tarafından sulh ve ibrâ-i câ’i’z-zikri ikrâra ve bedel-i sulhü kabza vekîl olup mezbûrenin zâtını ma‘rifet-i şer‘iyye ile ârifân olan Mehmed Çavuş b. Mustafa ve el-Hâc Mehmed b. İbrahim şehâdetleriyle şer‘an vekâleti sâbite olan umdetü’l-kuzâti’l-İslâm Sunullah Efendi b. Ömer Efendi nâm vekîl meclis-i şer‘de Havâss-ı Aliyye kazâsı a‘mâlinden kasaba-i Hasköy’de Abdüsselâm mahallesinde sâkine sâhibetü’l-kitâb Sâliha bt. Derviş Mehmed tarafından ikrâr-ı âti’z-zikri tasdîke vekîl olup bimâ hüve nehci’s-sübût şer‘an vekâleti sâbite olan Mehmed Bey oğlu Hasan Bey nâm vekîl mahzarında bi’l-vekâle ikrâr ve takrîr-i kelâm edip bundan akdem müvekkilem mezbûre Bedehşan Hâtun’un mülkünden Üftâde nâm Moskoviyyetü’l-asl câriye-i memlûkesi firâr ve gaybet etmeğin müvekkile-i mezbûre Sâliha Hâtun’dan zikr olunan câriyesini idlâl edip gaybet ettirmişsindir deyû da‘vâ ve kıymet-i şer‘iyyesini taleb eylediğinde ol dahi inkâr etmeğin beynlerinde münâza‘ât-ı kesîre cereyân etmişdi el-hâletü hâzihî müvekkilem mezbûre Bedehşan ile müvekkile-i mezbûre Sâliha Hâtun beynlerine muslihûn tavassut edip da‘vâ-yı mezkûrdan merkūme Sâliha ile müvekkilem mezbûre Bedehşan’ı üç bin beş yüz fıddî nakd-i râyic fi’l-vakt akçe üzerine inşâ-i akd-i sulh eylediklerinde ben dahi sulh-i mezbûru kabûl ve bedel-i sulh olan mezbûrü’n-na‘t üç bin beş yüz akçeyi tamamen müvekkile-i merkūme yedinden vekâletim hasebiyle müvekkile-i mezbûre için alıp kabz edip zikr olunan câriye da‘vâsından zimmetini ibrâ-i âmm-ı kātı‘ü’n-nizâ‘ ile ibrâ ve iskāt-ı tâmm-ı râfi‘ü’l-hisâm birle iskāt eyledim min ba‘d müvekkile-i mezbûre ile müvekkilim mezbûre Bedehşan’ın vechen mine’l-vücûh da‘vâ ve nizâ‘ı yokdur, zuhûr dahi ederse lede’l-hükkâmi’l-kirâm mesmû‘a olmasın deyicek gıbbe’t-tasdîki’l-mu‘teber müvekkile-i mezbûrenin zevci el-Hâc Mehmed nâm kimesne meclis-i mezbûrda vekîl-i mezbûr mahzarında bundan akdem zikr olunan câriyenin nısfı benim idi deyû da‘vâ eylemişdim el-hâletü hâzihî da‘vâ-yı mezkûrdan fâriğ olup müvekkile-i mezbûrenin zimmetini da‘vâ-yı mezbûrdan ben dahi ibrâ eyledim deyicek mâ cerâ ketb olundu. Fi’l-yevmi’t-tâsi‘ ve’l-ışrîn min Zilka‘deti’ş-şerîfe li seneti isneteyn ve seb‘în ve elf. Şuhûdü’l-hâl: Mehmed Çelebi b. Musli, Abbas Efendi b. ( ) el-İmâm, Ali Çelebi el-Yesârî, Ramazan Efendi el-Müezzin, Ali Ağa b. ( ) el-Bostânî ve gayruhüm mine’l-hâzırîn.