Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 404 Hüküm no: 427 Orijinal metin no: [92a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Çelebi b. Abdullah’ın alacağına karşılık rehin aldığı menzili Ayşe bt. Ali’ye iade etmesi Fekk-i rehin ve kefîl-i mezbûrun dahi zimmetini ibrâ Havâss-ı Aliyye kazâsına tâbi‘ kasaba-i Hasköy’de sâkin Ali Çelebi b. Abdullah nâm kimesne meclis-i şer‘de işbu râfi‘atü’l-kitâb Ayşe bt. Ali nâm hâtun mahzarında ikrâr ve takrîr-i kelâm edip kasaba-i mezbûr mahallâtından Kiremitçi Ahmed Çelebi mahallesinde vâki‘ iki tarafdan Ali Çelebi mülkü ve bir tarafdan Macarlar nâm yahudiler mülkleri ve bir tarafdan tarîk-i âm ile mahdûd mecmû‘ mülk menzilini mezbûre Ayşe Hâtun sene ihdâ ve seb‘în ve elf Şevvâlü’l-mükerremi’nin yirmi dördüncü günü otuz kıt‘a esedî guruşa bana alâ tarîki’l-istiğlâl bey‘ ve teslîm ve kabz-ı semen edip ben dahi tarîk-i mezbûr üzre iştirâ ve kabûl ve tesellüm eylediğimden sonra yine mahalle-i mezbûrede sâkin Yanbolu cemâ‘atinden Yako v. Papola nâm yahudi meblağ-ı mezbûru bana edâ ve teslîme emr ve kabûlü hâvî kefâlet-i sahîha-i şer‘iyye ile kefîl olmuşdu el-hâletü hâzihî zikr olunan otuz kıt‘a esedî guruşu tamamen merkūme Ayşe Hâtun yedinden alıp kabz edip fekk-i istiğlâl eyledim min ba‘d mezbûre Ayşe ve kefîl-i merkūm ile vechen mine’l-vücûh alâkam kalmadı husûs-ı mezbûra müte‘allik mezbûre Ayşe ve kefîl-i merkūmun zimmetlerini ibrâ eyledim deyicek gıbbe’t-tasdîki’l-mu‘teber mâ cerâ bi’t-taleb kayd şüd. Fî selh-i Zilka‘deti’ş-şerîfe li seneti isneteyn ve seb‘în ve elf. Şuhûdü’l-hâl: Yusuf b. Abdullah, Ali Beşe b. Mehmed er-Râcil, Mustafa Efendi imâm-ı Düğmeci, es-Seyyid Abdurrahman b. es-Seyyid eş-Şeyh Yakub, Mehmed b. Abdullah ve gayruhüm mine’l-hâzırîn.