Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 405 Hüküm no: 428 Orijinal metin no: [92b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Saadet bt. Abdullah ile müderris Ali Efendi’nin boşanması Yâ Fettâh Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Câmi‘-i Kebîr mahallesi sâkinelerinden Saadet bt. Abdullah nâm hâtun meclis-i şer‘-i hatîr-i lâzımü’t-tevkīrde zevc-i mutallıkı fahrü’l-müderrisîni’l-kirâm zahrü’l-müdakkikīni’l-fihâm Ali Efendi b. ( ) mahzarında bi’t-tav‘ ve’r-rızâ lâ-bi’l-kerh ve’l-cezâ ikrâr-ı tâm ve takrîr-i kelâm edip mûmâ-ileyh Ali Efendi bundan akdem zevcim olup beynimizde hüsn-i zindegânemiz olmamağla beni tatlîk etmeğin zimmetinde mütekarrir altı bin akçe mehr-i müeccelimi bana def‘ ve teslîm, ben dahi alıp kabz eylediğimden sonra nafaka-i iddetim için iki keyl pirinç, beş vakıyye revgan-ı sâde, on vakıyye un ve beher yevm ikişer akçe ekmek ve iddetim tamâmına değin yevmî buçuk vakıyye lahm ve beher yevm üçer akçe me’ûnet-i süknâm için ta‘yîn ve huzûr-ı şer‘de zikr olunan zahîreyi bana def‘ ve teslîme ta‘ahhüd eylediğinden sonra zevc-i mutallıkım mûmâ-ileyh Ali Efendi zimmetinde mukaddemâ mütekarrir olan mehr-i müeccelimden bâkī üç bin akçem ve cihet-i karz-ı şer‘îden dahi üç bin akçem kalmışdır deyû da‘vâ ve taleb eylediğimde ol dahi inkâr ile cevâb vermeğin beynimizde münâza‘ât-ı kesîre cereyân etmişidi el-hâletü hâzihî da‘vâ-yı mezkûremden mûmâ-ileyh Ali Efendi ile üç bin nakd-i râyic fi’l-vakt akçe üzerine vesâtat-ı muslihîn ile sulh olup bedel-i sulh olan mezbûrü’n-na‘t üç bin akçeyi zevc-i mutallıkım mûmâ-ileyh Ali Efendi yedinden tamamen alıp kabz edip zevciyyete müte‘allik âmme-i de‘âvî ve mütâlebât ve eymân ve muhâsamâtdan zimmetini ibrâ-i âmm-ı kātı‘ü’n-nizâ‘la ibrâ ve iskāt-ı tâmm-ı râfi‘ü’l-hisâm birle iskāt eyledim min ba‘d mûmâ-ileyh ile vechen mine’l-vücûh ve sebeben mine’l-esbâb da‘vâ ve nizâ‘ım yokdur, zuhûr dahi ederse lede’l-hükkâmi’l-kirâm mesmû‘a ve makbûle olmasın deyicek gıbbe’t-tasdîki’l-mu‘teber mâ cerâ kayd şüd. Fî gurreti Zilhicceti’l-harâm li sene isneteyn ve seb‘în ve elf. Şuhûdü’l-hâl: Fahri Efendi nâib-i recül, Eyüb Çelebi b. Mehmed, Sâlih Mehmed Efendi b. Mehmed, Hüseyin b. Hasan, Mehmed b. Mahmud ve gayruhüm.