Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 405 Hüküm no: 429 Orijinal metin no: [92b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma Hatun bt. Ahmed Çavuş’un terekesinin mirasçıları arasında paylaşılması Havâss-ı Aliyye kazâsına tâbi‘ kasaba-i Hasköy’de Turşucuzâde Hüseyin Çelebi mahallesinde Pîrî Paşa semtinde sâkine iken bundan akdem vefât eden Fâtıma Hâtun bt. Ahmed Çavuş’un verâseti, zevci fahrü’l-emâsil ve’l-akrân hamlacı Mehmed Ağa ile sadriye kebîre kızı Ayşe Hâtun bt. Mehmed’e münhasıra olduğu şer‘an zâhir ve tashîh-i mes’eleleri bi hükmi’l-ferâ’iz dört sehimden farz ve i‘tibâr olunup sihâm-ı mezkûreden bir sehmi zevci mûmâ-ileyh Mehmed Ağa’ya ve üç sehmi kızı müşârün-ileyhâ Ayşe Hâtun’a isâbet ve intikāl eylediği hâkim-i muvakki‘-i sadr-ı kitâb huzûrunda müte‘ayyin ve mütehakkik oldukdan sonra müteveffâ-yı mezbûrenin muhallefâtından mahalle-i mezbûrede vâki‘ lede’l-ahâlî ve’l-cîrân ma‘lûmetü’l-hudûd menzil-i müteveffât-ı mezbûrenin zevci mûmâ-ileyh ile kızı müşârün-ileyhâ beynlerinde bi’t-terâzî tevzî‘ ve taksîm için kıbel-i şer‘den bi’t-taleb irsâl olunan mevlânâ Sâlih Mehmed Efendi, ol dahi hâssa mi‘mârlarından Üstâd Ali Beşe b. Abdullah ve zeyl-i sahîfede muharrerü’l-esâmî olan müslimîn ile menzil-i mezbûra varıp akd-i meclis-i şer‘ eylediğinden sonra mûmâ-ileyh Mehmed Ağa asâleten ve müşârün-ileyhâ Ayşe Hâtun’un zevci ve tarafından her husûsuna vekâlet-i mutlaka ile vekîl-i şer‘î-i müsecceli olan mefhar-i erbâbi’t-tahrîr ve’l-kalem Ali Efendi b. el-Hâc Hüdâverdi mahzarlarında mi‘mâr-ı mezbûr menzil-i mezbûrun dâhiliyye ve hâriciyye ve fevkānî ve tahtânî odalar ve sofalar ve sâir binâlı ve binâsız olan yerlerini misâha ve takvîm eylediğinde menzil-i mezbûrun cem‘an binâlı olan yerleri tûlen ve arzen bi hesâb-ı terbî‘î bin beş yüz yetmiş dokuz zirâ‘ gelip ve zât eşcâr-ı müsmire ve gayr-ı müsmireli bahçeler ve bağı ve binâsız olan mahalli cem‘an altı bin üç yüz otuz beş zirâ‘ gelip menzil-i mezbûrun mebnî olan mahalline üç yüz doksan beş zirâ‘ı zevci mezbûr Mehmed Ağa’ya bin yüz seksen dört zirâ‘ı kızı müvekkile-i müşârün-ileyhâya ve binâsızdan dahi bin beş yüz seksen dört zirâ‘ı mezbûr Mehmed Ağa’ya ve dört bin yedi yüz elli bir zirâ‘ı müvekkile-i müşârün-ileyhâya isâbet ve intikāl etmeğin vekîl-i mûmâ-ileyh Ali Efendi meclis-i ma‘kūd-ı mezkûrda müşârün-ileyh Mehmed Ağa mahzarında bi’l-vekâle ikrâr ve takrîr-i kelâm edip menzil-i mezkûrun binâlı ve binâsız olan yerlerinde zevci mezbûr Mehmed Ağa’ya cem‘an bin dokuz yüz yetmiş dokuz zirâ‘ yer isâbet etmeğin yine menzil-i mezbûrdan ikinci sedde kemer üzerinde bir tarafdan Hanes Ermeni mülkü ve tarafeyni müvekkilem mezbûrenin mülk-i mevhûbu ve mülk-i mevrûsu ve bir tarafdan ba‘zan kâtib Mehmed Efendi mülkü ve ba‘zan tarîk-i âm ile mahdûd mebnî ve gayr-ı mebnî cem‘an iki bin sekiz yüz kırk zirâ‘ yer ki mezbûr Mehmed Ağa hissesinden sekiz yüz altmış bir zirâ‘ fazladır ve tûlen dokuz ve arzen dört buçuk zirâ‘ sakfı ve bir su kuyusunu ve havuzu ve üzerinde bir bâb fevkānî oda ve dehliz ve ocaklı ve ocaksız cem‘an altı bâb oda ve bir matbah ve fırını ve su kuyusunu ve üç kıt‘a sed üzerinde ve sokak kapısı kurbunda zât eşcâr-ı müsmire ve gayr-ı müsmire bahçeyi müştemil olan mahal aşağı duvar Mehmed Ağa’nın, yukarı duvar müvekkilem mezbûrenin olmak üzre mûmâ-ileyh Mehmed Ağa hissesine bi’t-terâzî ta‘yîn olunup müvekkilem müşârün-ileyhânın hissesine isâbet eden mahal mezbûr Mehmed Ağa hissesinden şerîf olmağla ol fazla olan sekiz yüz altmış bir zirâ‘dan mezbûr Mehmed Ağa’nın zimmetini bi’l-vekâle ibrâ ve iskāt eylemişdir ba‘de’l-yevm hudûd-ı mezkûr ile mahdûd olan mahall-i mezbûr Mehmed Ağa’nın mülk-i mevrûsudur. Keyfe mâ yeşâ’ mutasarrıf olsun deyicek mezbûr Mehmed Ağa dahi kabûl ve mukırr-ı mezbûru bi’l-muvâcehe tasdîk etmeğin vâki‘ü’l-hâli mevlânâ-yı mezbûr mahallinde tahrîr ba‘dehû meclis-i şer‘de alâ vukū‘ihî inhâ ve takrîr etmeğin mâ cerâ kayd şüd. Fi’l-yevmi’s-sâbi‘ min Zilka‘deti’ş-şerîfe li sene isneteyn ve seb‘în ve elf. Şuhûdü’l-hâl: Mehmed Ağa b. Pîrî, Bayram Ağa b. Ali, Hüseyin Efendi b. Ahmed el-Kâtib, es-Seyyid Bayram Ağa b. es-Seyyid Abdurrahman, Sinan Ağa b. Hasan, Mehmed Çelebi b. Hasan, Ali Efendi el-İmâm, Hüseyin Bey b. Ali, Ahmed Ağa b. Zünnun, Ahmed Ağa b. Ali, Ali Çelebi b. Hızır ve gayruhüm.