Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 407 Hüküm no: 430 Orijinal metin no: [93a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Reis’in kendisinden haksız yere para aldıklarını bildirdiği Selânik Kadısı İsa Efendi ve vekiliyle olan davada anlaşma sağlandığı Mellâh tâifesinden Mehmed Reis b. el-Hâc Veli nâm kimesne meclis-i şer‘-i hatîr-i lâzımü’t-tevkīrde medîne-i Selânik’de seccâde-nişîn-i şer‘-i Muhammedî olan iftihârül-ulemâ’i’l-mütehakkikīn, muhtârü’l-fuzalâ’i’l-müdakkikīn, hallâlü’l-müşkilât, keşşâfü’l-mu‘dilât hâfızü’l-kitâbi’l-müstetâb Abdullah Efendi [b.] el-mevlâ’l-mevâliyyi’l-merhûm Mustafa Efendi taraf-ı karîni’ş-şereflerinden ikrâr-ı âti’z-zikri tasdîke vekîl olup nehc-i şer‘î üzre vekâleti sâbite olan fahrü’l-emâsil ve’l-eşbâh Mustafa Ağa b. Ahmed mahzarında ikrâr ve takrîr-i kelâm edip bundan esbak müvekkil-i müşârün-ileyh İsâ Efendi hazretleri medîne-i mezbûrede hâkim-i şer‘-i İlâh ve hâdim-i dîn-i risâlet-penâh iken ben sefînem ile medîne-i mezbûre iskelesine varıp etrâf kurâdan arpa ve buğday ve sâir tereke iştirâ etmek murâd eylediğimde müvekkil-i müşârün-ileyh efendi hazretleri bana vech-i mübeyyen üzre tereke iştirâ etmek üzre mürâsele verip ol mukābelede muhzırbaşı yediyle benden bi gayri hakkın elli kıt‘a riyâlî guruş ahz ü kabz etmeğin ben dahi zikr olunan elli guruşumu mûmâ-ileyh efendi hazretlerinden taleb ve da‘vâ eylediğimde inkâr ile cevâb verdiklerinde beynimizde münâza‘ât-ı kesîre cereyân etmişidi el-hâletü hâzihî beynimize muslihûn tavassut edip da‘vâ-yı mezkûrumdan müvekkil-i müşârün-ileyh efendi hazretleri ile beni an inkâr iki bin dört yüz fıddî nakd-i râyic fi’l-vakt akçe üzerine inşâ-i akd-i sulh eylediklerinde ben dahi sulh-i mezbûru kabûl ve bedel-i sulh olan mezbûrü’n-na‘t iki bin dört yüz akçeyi tamamen müvekkil-i mûmâ-ileyh Abdullah Efendi yedinden tamamen alıp kabz edip mâ‘adâ da‘vâsından zimmet-i şerîflerini ibrâ-i âmm-ı kātı‘ü’n-nizâ‘la ibrâ eyledim. Müvekkil-i mûmâ-ileyh ile vechen mine’l-vücûh ve sebeben mine’l-esbâb da‘vâ ve nizâ‘ım yokdur, zuhûr dahi ederse lede’l-hükkâmi’l-kirâm mesmû‘a ve makbûle olmasın deyicek gıbbe’t-tasdîki’l-mu‘teber mâ hüve’l-vâki‘ kayd şüd. Fi’l-yevmi’s-sâlis min Zilhicceti’l-harâm li sene isneteyn ve seb‘în ve elf. Şuhûdü’l-hâl: Receb Çavuş el-Mübâşir, el-Hâc Mustafa b. Yusuf, umdetü’l-müderrisîni’l-kirâm Mehmed Kadri Efendi, Hüseyin b. Osman, Hasan b. Abdi, Ali Beşe Çukadâr ve gayruhüm mine’l-hâzırîn.