Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 408 Hüküm no: 431 Orijinal metin no: [93a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe Hatun bt. Abdullah’ın, Yako v. Papola’da olan alacaklarını tamamen tahsil etmesi Havâss-ı Aliyye kazâsına tâbi‘ kasaba-i Hasköy’de Kiremitçi Ahmed Çelebi mahallesi sâkinelerinden Ayşe Hâtun bt. Abdullah meclis-i şer‘de Yanbolu cemâ‘atinden işbu râfi‘ü’s-sifri’ş-şer‘î Yako v. Papola nâm zimmî muvâcehesinde bi tav‘ihî ikrâr ve takrîr-i kelâm edip bundan akdem mesfûr Yako benden yüz on beş kıt‘a riyâlî guruş-ı kebîr istikrâz ve kabz edip târih-i kitâbdan beş sene mukaddem kasaba-i mezbûre mahkemesinde sicil ve hüccet olmuş iken, bi’d-defe‘ât merkūm Yako yedinden yüz kıt‘a riyâlî guruş-ı kebîrini alıp kabz etmişidim el-hâletü hâzihî meblağ-ı bâkī on beş kıt‘a riyâlî guruşu dahi bana meclis-i şer‘de def‘ ve teslîm, ben dahi alıp kabz edip merkūmun zimmetinde bir akçe bâkī kalmamışdı. Lâkin merkūme Yako zikr olunan hücceti benden taleb eylediğinde ben dahi hüccet-i mezkûreyi zâyi‘ etmişidim. Min ba‘d mesfûr Yako zimmetinde zikr olunan yüz on beş kıt‘a riyâlî guruşdan bir akçe ve bir habbe hakkım bâkī kalmadı ba‘de’l-yevm hüccet-i mezbûre bulunup benden veya vekîlimden zikri sâbık yüz on beş kıt‘a guruşa müte‘allik da‘vâ ve nizâ‘ım zuhûr ederse lede’l-hükkâmi’l-kirâm mesmû‘a ve makbûle olmasın deyicek gıbbe’t-tasdîki’ş-şer‘iyyi’l-mu‘teber mâ hüve’l-vâki‘ kayd şüd. Tahrîren fî selh-i Zilka‘deti’ş-şerîfe li sene isneteyn ve seb‘în ve elf. Şuhûdü’l-hâl: Ali Çelebi b. Abdullah, Yusuf b. Abdullah zevc-i mukırra, Mustafa Efendi imâm-ı Düğmeci, es-Seyyid Abdurrahman b. es-Seyyid eş-Şeyh Yakub, Mehmed Beşe karcıbaşı ve gayruhüm mine’l-hâzırîn.