Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 408 Hüküm no: 432 Orijinal metin no: [93a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Beşe ortağı Himmet Beşe’nin kendilerinden haksız para aldığını bildirdikleri Selânik Kadısı Abdullah Efendi ile olan davada anlaşma sağlandığı Mellâh tâifesinden Mehmed Beşe b. Musa ve şerîki Himmet Beşe b. Hüseyin nâm kimesneler meclis-i şer‘-i şerîfde medîne-i Selânik’de mesned-nişîn-i şerî‘at-ı garrâ olan a‘lemü’l-ulemâ’i’l-izâm, efdalü’l-fuzalâ’i’l-fihâm, sâhibü’l-me‘âlî ve’l-mefâhir, vârisü’l-mecd ve’ş-şeref kâbiren an kâbir, sâhibü’l-kitâbi’l-müstetâb Abdullah Efendi necli’l-mevlâ’l-merhûm Mustafa Efendi cenâb-ı şerîflerinden ikrâr-ı âti’z-zikri tasdîke vekîl olup bimâ hüve nehci’s-sübût şer‘an vekâleti sâbite olan Mustafa Ağa b. Ahmed mahzarında her biri ikrâr ve takrîr-i kelâm edip müvekkil-i mûmâ-ileyh Abdullah Efendi hazretleri bundan medîne-i mezbûre kadı ve hükûmeti beyne’l-ibâd cârî iken, biz sefînemiz ile medîne-i mezbûre iskelesine varıp etrâf kurâdan arpa ve buğday ve sâir tereke iştirâsına râgıb olduğumuzda, mûmâ-ileyh Efendi hazretleri etrâf kurâ ahâlîlerinden murâd eylediğimiz üzre akçemiz ile tereke almak için yedimize mürâsele verip ol mukābelede bizden muhzırbaşı yediyle altmış kıt‘a riyâlî guruş almışidi el-hâletü hâzihî zikr olunan altmış guruşu müvekkil-i müşârün-ileyh efendi hazretlerinden taleb ve da‘vâ eylediğimizde inkâr ile cevâb vermeğin beynimizde münâza‘ât-ı kesîre cereyân etmişidi hâlâ beynimize muslihûn tavassut edip da‘vâ-yı mezkûremizden müşârün-ileyh efendi hazretleri ile bizi an inkâr üç bin beş yüz fıddî nakd-i râyic fi’l-vakt akçe üzerine inşâ-i akd-i sulh eylediklerinde biz dahi sulh-i mezbûru kabûl ve bedel-i sulh olan mezbûrü’n-na‘t üç bin beş yüz akçeyi tamamen müvekkil-i mûmâ-ileyh Abdullah Efendi hazretleri yed-i şerîflerinden alıp kabz edip mâ‘adâ da‘vâsından mûmâ-[ileyh] efendi hazretlerinin zimmetini ibrâ ve iskāt eyledik ba‘de’l-yevm mûmâ-ileyh ile vechen ve sebeben mine’l-esbâb da‘vâ ve nizâ‘ımız yokdur. Zuhûr dahi ederse lede’l-hükkâmi’l-kirâm mesmû‘a olmasın dediklerinde gıbbe’t-tasdîk mâ cerâ kayd şüd. Fi’l-yevmi’s-sâlis min Zilhicceti’l-harâm li sene isneteyn ve seb‘în ve elf. Şuhûdü’l-hâl: Receb Çavuş el-Mübâşir, el-Hâc Mustafa b. Yusuf, Fahrü’l-müderrisîni’l-kirâm Mehmed Kadri Efendi, Hüseyin b. Osman, Hasan b. Abdi, Ali Beşe Çukadâr, Receb Kethüdâ [b.] Maden, Dilâver muhzır ve gayruhüm mine’l-hâzırîn.