Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 409 Hüküm no: 433 Orijinal metin no: [93b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Çavuş Ali Çelebi’nin bahçıvan Mustafa Çelebi’de olan alacağını tahsil etmesi Sâbıkan Dergâh-ı âlî yeniçerileri mumcularından olup hâlâ Çavuş olan Ali Çelebi b. Üveys nâm kimesne meclis-i şer‘de işbu hâfızü’l-kitâb Mustafa Çelebi b. Mehmed nâm bahçevân mahzarında ikrâr ve takrîr-i kelâm edip sâbıkan yeniçeri efendisi olup Matbah-ı âmire emîni olan iftihârü’l-emâcid ve’l-ekârim câmi‘ü’l-mehâmid ve’l-mekârim Yusuf Efendi’nin medîne-i Hazret-i Ebâ Eyyûb’da vâki‘ lede’l-ahâlî ve’l-cîrân ma‘lûmetü’l-hudûd bostanda bundan esbak ben müste’cir iken mûmâ-ileyh ile fesh-i akd-i icâre edip mezbûr Mustafa Çelebi bostan-ı mezkûru îcâr eylediğinde bostan-ı mezkûrda benim mülküm olan tereke ve sâir âlâtımı üstâdlar hesâb ve kitâb eylediklerinde kâmil otuz beş bin akçelik rızkım zuhûr etmeğin zikr olunan tereke ve âlâtımı merkūm Mustafa Çelebi’ye huzûr-ı müslimînde vech-i muharrer üzre bey‘ ve teslîm, ol dahi iştirâ ve tesellüm ve semeni olan meblağ-ı mezbûrdan on beş bin akçesini bana def‘ ve teslîm, ben dahi alıp kabz eylediğimden sonra on sekiz bin akçesini mûmâ-ileyh Yusuf Efendi’ye bostan-ı mezkûr îcâresinden ve sâir husûsdan deynim olan on sekiz bin akçe mukābelesinde mezbûr Mustafa Çelebi’den havâle eylemişiken, meblağ-ı bâkī iki bin akçeyi mezbûr Mustafa Çelebi’den taleb eylediğimde senin Yusuf Efendi’ye yirmi bin akçe deynin vardır, ben ana yirmi bin akçe vermişidim deyû cevâb vermeğin ben dahi huzûr-ı hâkimde meblağ-ı mezbûr merkūm Mustafa Çelebi’den da‘vâ eylediğimde ba‘de’l-ikrâr edâsına hükm-i hâkim lâhık olmuşidi el-hâletü hâzihî yedinde zikr olunan iki bin akçeyi tamamen merkūm Mustafa Çelebi yedinden alıp kabz edip mezbûrü’n-na‘t otuz beş bin akçeden mezbûr Mustafa Çelebi ve mûmâ-ileyh Yusuf Efendi zimmetlerinde bir akçe hakkım kalmadı. Husûs-ı mezbûra müte‘allik âmme-i de‘âvîden ikisinin dahi zimmetlerini ibrâ eyledim dedikde gıbbe’t-tasdîki’l-mu‘teber mâ cerâ kayd şüd. Fî selhi Zilka‘deti’ş-şerîfe li sene isneteyn ve seb‘în ve elf. Şuhûdü’l-hâl: Abdülkerim Çelebi b. eş-Şeyh Mehmed, Ali Çelebi b. Müyesser, Mehmed b. Hasan, Hamza Efendi nâib-i recül, Hüseyin Çelebi b. Mehmed ve gayruhüm mine’l-hâzırîn.