Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 410 Hüküm no: 434 Orijinal metin no: [93b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan b. Müyesser’in hamile boşadığı eşi Payidar bt. Abdullah’a, nafaka ödemesi Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Aşçıbaşı mahallesinde sâkine hâmiletü’l-kitâb Payidâr bt. Abdullah nâm hâtun mahfil-i kazâ ve mahall-i hükm ve imzâda zevc-i mutallıkı Hasan b. Müyesser nâm kimesne mahzarında takrîr-i kelâm ve ifâde-i merâm edip mezbûr Hasan bundan akdem zevcim olup beynimizde şikāk vâki‘ olmağla merkūm Hasan beni tatlîk edip lâkin mezbûrun firâşından hâsıl beş aylık hamlim olmağla inkızâ-i iddetim vaz‘-ı hamlime mevkūf olmağın bi hasebi’ş-şer‘i’ş-şerîf zevc-i mutallıkım merkūm Hasan üzerine iddetim münkaziye olunca kadr-i ma‘rûf nafaka farz ve takdîr olunmak matlûbumdur deyicek hâkim-i muvakki‘-i sadr-ı kitâb tûbâ-lehû ve hüsnü me’âb hazretleri dahi tarafeynin rızâlarıyla zevce-i mutallakası merkūm Payidâr’ın nafaka ve kisve ve sâir havâic-i zarûriyesi için zevc-i mutallıkı merkūm Hasan üzerine merkūme talebiyle târih-i kitâbdan beher yevm üçer akçe nafaka farz ve takdîr ve inde’z-zarûre istidâne ve lede’z-zafer zevc-i mutallıkı mersûm Hasan üzerine rücû‘a izin birle mâ cerâ bi’t-taleb kayd şüd. Fi’l-yevmi’s-sâmin aşer min Zilka‘deti’ş-şerîfe li sene isneteyn ve seb‘în ve elf. Şuhûdü’l-hâl: Hamza Efendi nâib-i recül, Hüseyin Muhzır, Receb Kethüdâ b. Maden, Mehmed Beşe b. Musli ve gayruhüm mine’l-hâzırîn.