Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 316 Hüküm no: 356 Orijinal metin no: [48a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rukiye Hatun’un babası Ak Mehmed tarafından vakıf arsasına yapılan ve kendisine intikal eden binaya yapılan masrafın tespiti ve keşfi Mahmiye-i İstanbul’da Atmeydanı’nda İbrahim Paşa sarayı kurbunda Uzun Şuca‘ mahallesi sâkinelerinden Rukiye Hâtun bt. Ak Mehmed meclis-i şer‘-i şerîf-i şâmihü’l-imâd ve mahfil-i dîn-i münîf-i râsihü’l-evtâdda takrîr-i kelâm ve ta‘bîr ani’l-merâm edip merhûm Câmeşûy İbrahim Çelebi nâm sâhibü’l-hayrın sulehâya meşrûta vakfı olup mahalle-i mezbûrede vâki‘ bir tarafdan umdetü’l-emâcid ve’l-ekârim Ali Ağa menzili ve bir tarafdan vakf-ı mezbûrdan fahrü’l-eimme İbrahim Efendi tasarrufunda olan menzil ve bir tarafdan mefharü’l-emâcid ve’l-ekârim Şaban Ağa mülkü ve bir tarafdan tarîk-i hâs ile mahdûd olup hâlâ arsası sulehâdan olmağla tavzîh-i hâkim ile zevcim Abdullah Çelebi b. Mehmed’in tasarrufunda olan menzili mürûr-ı eyyâm ve kürûr-ı a‘vâm ile harâb olup bir vechile kābil-i süknâ olmamağla kadîmen hasren vârisesi olduğum babam mezbûr Ak Mehmed, ber mûceb-i şart-ı vâkıf tevcîh-i hâkim tasarrufunda iken izn-i mütevellî ve re’y-i hâkim ile nefsi için mülkü olmak üzre kendi malıyla müceddeden binâ eylemiş idi, hâliyâ vefât eyledikde menzil-i mezkûrun ebniyesi bi hasebi’l-irsi’ş-şer‘î bana intikāl eylemeğin kıbel-i şer‘-i enverden üzerine varılıp masrûfu tahmîn-i sahîh ile [tahmîn] ve takvîm olunmak matlûbumdur dedikde, savb-ı şer‘-i hatîr-i lâzımü’t-tevkīrde bu fakīr [ve] hâssa mi‘mârlarından üstâd el-Hâc Hasan Halîfe b. Ömer ve üstâd Mustafa Halîfe b. Ali ve zeyl-i rakīmde isimleri terkīm olunup ebniye ve sukūf ahvâline kemâl-i vukūfu olan bî-garaz müslimîn ile üzerine varıp mi‘mârân-ı mezbûrân menzil-i mezkûrun bi’l-fi‘l mütevellîsi olan fahrü’l-eşbâh el-Hâc Yusuf b. Abdullah muvâcehesinde mesâha eylediklerinde tûlen ve arzen bi hesâb-ı terbî‘î bennâ zirâ‘ıyla yüz yirmi dokuz zirâ‘ tahta döşemenin bir zirâ‘ı otuzar akçeden üç bin sekiz yüz yetmiş akçeye ve bi hesâb-ı mezbûr üç yüz doksan bir zirâ‘ dolma duvarın her zirâ‘ı kırkar akçeden on beş bin altı yüz kırk akçe ve bi hesâb-ı mezbûr doksan iki zirâ‘ sâde tavanın her zirâ‘ı kırkar akçeden üç bin altı yüz seksen akçe ve bi hesâb-ı mesfûr iki yüz kırk sekiz zirâ‘ sakfın her zirâ‘ı kırkar akçeden dokuz bin dokuz yüz yirmi akçe [48b] ve bi hesâb-ı mastûr yirmi zirâ‘ taş duvarın her zirâ‘ı ellişer akçeden bin akçe ve bi hesâb-ı merkūm otuz üç zirâ‘ tahta perdenin her zirâ‘ı on beşer akçeden dört yüz doksan beş akçe ve bir sâde masandra bin akçe def‘a bir sâde masandra yedi yüz akçe ve sekizer tahta billurdan masnû‘ iki cam yüz yirmişer akçeden iki yüz kırk akçe ve ağaç toplu iki pencere yüz ellişer akçeden üç yüz akçe ve bir kemer oda kapısı üç yüz akçe ve ağaç toplu bir sagīr pencere yüz akçe ve altı hurda İznikmid direkleri yüzer akçeden altı yüz akçe ve üç kilidi otuzar akçeden doksan akçe ve yedi kulaç su kuyusu her kulacı üçer yüz akçeden iki bin yüz akçe ve on beş basamaklı cunbalı bir nerdübân bin akçe def‘a dokuz basamaklı cunbalı bir nerdübân dört yüz akçe ve etrâf-ı erba‘adan tahta havâlesi ve döşemesi ve nerdübânı ile bir tahta-pûş bin beş yüz akçe def‘a direkleri ve tahta döşemesi ile bir tahta-pûş altı yüz akçe ve dokuzar tahta billurdan masnû‘ iki cam yüz otuz beşer akçeden iki yüz yetmiş akçe ve dört çarha cam yüz yirmişer akçeden dört yüz seksen akçe ve bir oda ocağı bin iki yüz akçe def‘a bir oda ocağı bin beş yüz akçe ve bir kafesli masandra bin beş yüz akçe ve bir sandık dolap iki yüz elli akçe ve bir Medine köşe dolabı yüz elli akçe ve iki sâde oda kapısı ikişer yüz akçeden dört yüz akçe ve dört tahta raf otuzar akçeden yüz yirmi akçe ve altı ağaç parmaklı pencere yüzer akçeden altı yüz akçe ve dört ağa tahtası yirmişer akçeden seksen akçe ve on iki buçuk zirâ‘ nîm şişli perde her zirâ‘ yirmi beşer akçeden üç yüz on iki akçe ve sakfıyla duvarıyla bir matbah üç bin akçe ve kâriziyle bir kenîf bin akçe ve ağa tahtasından masnû‘ bir orta kapı yüz akçe ve bir sokak kapısı yedi yüz akçe cem‘an elli beş bin altı yüz doksan yedi akçe ile ancak olur, bundan eksik ile binâ olunmak mümkün değildir, meblağ-ı mezkûrdan sâbıkan tahmîn olunmuş olan altı bin üç yüz yetmiş beş akçe nukz bahâsı ihrâc olunucak kırk dokuz bin üç yüz yirmi iki akçe masrûfu bâkī kalır deyû mi‘mârân-ı mezbûrân ve mezkûrîn icmâ‘ ve ittifâk ettiklerinde mâ hüve’l-vâki‘ bi’l-ibtigā ketb ve imlâ olundu. Fi’l-yevmi’s-sâdis ve’l-ışrîn min Cemâziyelâhir li sene seb‘a ve seb‘în ve elf. Şuhûdü’l-hâl: Receb Efendi b. Mustafa, Mehmed Çelebi b. Dilâver, Ali Çelebi b. Receb, Hasan Bey b. Bayram Mehter-i hayme, fahrü’l-eimme Abdurrahman Efendi b. Osman Efendi ve gayruhüm.