Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 411 Hüküm no: 435 Orijinal metin no: [93b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Naime bt. Abdullah’ın menzilini Rabia Hatun bt. Mehmed’e satması Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Baba Haydar-ı Nakşibendî mahallesinde sâkine Naime bt. Abdullah nâm hâtun meclis-i şer‘-i şerîfde işbu kitâb-ı sıhhat-nisâbın sâhibesi fahrü’l-muhadderât Râbia Hâtun bt. Mehmed tarafından ikrâr-ı âti’z-zikri tasdîke vekîl olup bimâ hüve nehci’s-sübût şer‘an vekâleti sâbite olan sadrî kebîr oğlu Çorbacızâde Mehmed Çelebi b. Mahmud mahzarında ikrâr ve takrîr-i kelâm edip akd-i âti’z-zikrin sudûruna değin silk-i mülk-i sahîhimde münselik olan emlâkimden mahalle-i mezbûrede vâki‘ bir tarafdan suyolcu el-Hâc Mehmed mülkü ve bir tarafdan Belkıs Hâtun vakfı ve bir tarafdan kurşuncu Yusuf mülkü ve bir tarafdan tarîk-i âm ile mahdûd mülk menzilimi cemî‘ tevâbi‘ ve levâhıkı ve âmme-i menâfi‘ ve merâfıkı ile ki bir bâb tahtânî ve bir bâb fevkānî odaları ve bir su kuyusunu ve hadîka-i zât-ı eşcâr-ı müsmire ve gayr-ı müsmireyi müştemildir, müvekkile-i mezbûre Râbia Hâtun’a yirmi altı bin fıddî nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i kat‘î ile bey‘ ve teslîm eylediğimde ol dahi ber minvâl-i muharrer iştirâ ve tesellüm ve kabz ve kabûl edip semeni olan mezbûrü’n-na‘t yirmi altı bin akçeyi tamamen müşteriye-i mezbûre yedinden alıp kabz edip menzil-i mezkûrda vechen mine’l-vücûh alâka ve medhalim yokdur. Ba‘de’l-yevm menzil-i mahdûd-ı mezkûr müşteriye-i mezkûrenin mülk-i mahz-ı müşterâsı ve hakk-ı sarîhidir. Keyfe mâ yeşâ’ mutasarrıfe olsun dedikde gıbbe’t-tasdîki’l-mu‘teber mâ cerâ kayd şüd. Tahrîren fi’l-yevmi’r-râbi‘ min Zilhicceti’ş-şerîfe li sene isneteyn ve seb‘în ve elf. Şuhûdü’l-hâl: Eş-Şeyh Abdullah el-Halvetî, Halil Halîfe el-Müezzin, Hasan Çelebi el-Hattât, Yusuf Çelebi el-Hattât, Ebûbekir Çelebi b. Mustafa el-Kazzâz, Ali Beşe Çukadâr, muhzır Mehmed, Hasan b. Abdullah, Dilâver Muhzır ve gayruhüm mine’l-hâzırîn.