Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 411 Hüküm no: 436 Orijinal metin no: [94a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Polo bt. Şemuyil’in menzil hissesini kardeşlerine satması Havâss-ı Aliyye kazâsı tevâbi‘inden kasaba-i Hasköy’de Pîrîpaşa mahallesi sâkinelerinden Polo bt. Şemuyil nâm yahudiye meclis-i şer‘-i hatîr-i lâzımü’t-tevkīrde li eb ve üm karındaşları olup yahud tâifesinden işbu ashâbü’l-vesîka Yasef ve Sabatay ve Menahem evlâd-ı Şimoyil nâm yahudiler muvâcehelerinde bi’t-tav‘ ve’r-rızâ lâ-bi’l-kerh ve’l-cezâ ikrâr ve takrîr-i kelâm edip akd-i âti’z-zikrin sudûruna değin karındaşlarım mezbûrûn ile ale’l-iştirâki’s-seviy mülk-i mevrûsumuz olan emlâkden olup mahalle-i mezbûrede vâki‘ bir tarafdan Musli Paşa mülkü ve taraf-ı selâsesi Matadinye ve ba‘zan Avraham v. Yakob nâm yahudiler mülkleri ile mahdûd ve mümtâz olan iki bâb tahtânî oda ve bir su kuyusunu ve zât eşcâr-ı müsmire ve gayr-ı müsmire bahçeyi ve kenîfi müştemil olan mülk-i mevrûs menzilde, benim hisseme isâbet ve intikāl eden dokuz sehimde bir sehim hisse-i şer‘iyye-i şâyi‘amı, karındaşlarım merkūmûna yetmiş kıt‘a esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm, anlar dahi ale’ş-şirketi’s-seviyye minvâl-i muharrer üzre iştirâ ve tesellüm ve kabz ve kabûl eyleyip semeni olan mezbûrü’n-na‘t yetmiş kıt‘a esedî guruşu merkūmûn karındaşlarım Yasef ve Sabatay ve Menahem yedlerinden tamamen alıp kabz eylediğimden sonra sâlifü’z-zikr menzil-i mahdûd-ı mezkûrda o[lan] dokuz sehmin bir sehminde benim vechen mine’l-vücûh ve sebeben mine’l-esbâb alâka ve medhalim kalmadı ba‘de’l-yevm karındaşlarım merkūmûn Yasef ve Sabatay ve Menahem’in mülk-i müşterâları olmuşdur. Keyfe mâ yeşâ’ân her biri ale’l-iştirâk mutasarrıf olsunlar dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fî gurreti Zilhicceti’ş-şerîf li sene isneteyn ve seb‘în ve elf. Şuhûdü’l-hâl: Çukadâr Ali Beşe, Mehmed Çelebi b. Mustafa, Hüseyin Çelebi b. Ali, Diğer Hüseyin b. Hasan ve Arslan v. Samarya ve Abraham v. İlya ve İlya v. Kalfa ve Menahiye v. Arakil gayruhüm mine’l-hâzırîn.