Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 417 Hüküm no: 442 Orijinal metin no: [95a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nikola v. Yorgi’nin mirasının taksimi Havâss-ı Refî‘a kazâsı tevâbi‘inden Cebeci nâm karyede sâkin iken bundan akdem hâlik olan Nikola v. Yorgi nâm merdûdun verâseti, sulbî kebîr oğulları Yorgo ve Dimitri ve Panayot nâm zimmîler ile sulbiye-i kebîre kızı Kortişe nâm nasrâniyeye münhasıra olduğu şer‘an zâhir ve müte‘ayyin oldukdan sonra evvelen merkūm Yorgo meclis-i şer‘de karındaşları merkūmân Dimitri ve Panayot ve hemşîresi merkūme Kortişe muvâcehelerinde ikrâr ve takrîr-i kelâm edip mûrisimiz babam hâlik-i mezbûr düyûnu terekesini müstağraka olmağla min ba‘d babam hâlik metrûkâtından kasr-ı yed ve kat‘î alâka eyledim karındaşlarım mezbûrân ve hemşîrem merkūme babam hâlik-i mezbûrun düyûnunu edâ ve muhallefâtına dahi keyfe mâ yeşâ’ mutasarrıf olsunlar dedikde gıbbe’t-tasdîk ve’l-kabûl bülûğunu mu‘terif olup sin ve cüssesinin bülûğa tahammülü olan mersûm Panayot ile merkūme Kortişe meclis-i şer‘de işbu hâmilü’s-sifr merkūme Kortişe’nin zevci Nikola v. Todori nâm zimmî muvâcehesinde her biri ikrâr ve takrîr-i kelâm edip mûrisimiz babamız hâlik-i mezbûrun on iki bin akçe düyûnu olup ba‘de helâkihî ism-i mâl ıtlâk olunur metrûkât kısmından karye-i mezbûrede vâki‘ bir tarafdan Yorgi Kalma mülkü ve bir tarafdan Papas’a meşrûta menzil ve tarafeyni mer‘â ve bayır ve tarîk-i âm ile mahdûd bir bâb fevkānî oda ve sundurma ve tahtında ahırı müştemil on iki bin kıymetli mülk menzilinden gayrı bir nesnesi kalmamağla karındaşımız mersûm Yorgo menzil-i mezbûrdan kasr-ı yed ve kat‘-ı alâka etmeğin biz dahi zikr olunan on iki bin akçe düyûnu malımızdan dörder bin akçe verip ashâbına edâ edip menzil-i mahdûd-ı mezbûru kabz ve zabt etmişidik el-hâletü hâzihî menzil-i mahdûd-ı mezkûrun üç sehimde iki sehm-i şâyi‘ini merkūm Nikola’ya sekiz bin fıddî nakd-i râyic fi’l-vakt akçe tarafeynden îcâb ve kabûlü hâvî bey‘-i bâtt-ı sahîh-i şer‘î ile bâtten bey‘ eylediğimizde ol dahi vech-i muharrer üzre iştirâ ve tesellüm ve kabz ve kabûl eyledikden sonra semeni olan meblağ-ı mezbûr sekiz bin akçeyi tamamen mersûm Nikola yedinden alıp kabz edip menzil-i mezkûrun iki sehm-i şâyi‘inde kat‘an bizim alâka ve medhalimiz kalmadı ba‘de’l-yevm menzil-i mahdûd-ı mezkûrun üç sehimde iki sehmi cemî‘ tevâbi‘ ve levâhıkı ile merkūm Nikola’nın mülk-i müşterâsıdır. Keyfe mâ yeşâ’ mutasarrıf olsun ve bir sehmi dahi karındaşım mesfûr Dimitri’nin zabt ve taht-ı yedinde kalmışdır dediklerinde gıbbe’t-tasdîki’ş-şer‘î mâ hüve’l-vâki‘ kayd şüd. Fi’l-yevmi’l-hâmis min Zilhicceti’l-harâm li sene isneteyn ve seb‘în ve elf. Şuhûdü’l-hâl: Hüseyin b. Hasan, Mehmed Çelebi b. Turâbî, Mehmed b. Mahmud, Receb Bey Kethüdâ, Hüseyin muhzır ve gayruhüm mine’l-hâzırîn.