Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 418 Hüküm no: 443 Orijinal metin no: [95a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mülâyim bt. Abdullah ile Ali b. Pîrî’nin boşanması Medîne-i hazret-i Ebâ Eyyûb el-Ensârî -radıyallâhu anhu Rabbühü’l-Bâ[rî]-de Düğmecibaşı mahallesi sâkinelerinden Mülâyim bt. Abdullah nâm hâtun meclis-i şer‘de zevci işbu bâ‘isü’l-vesîka Ali b. Pîrî nâm darîr mahzarında bi tav‘ihâ ikrâr ve takrîr-i kelâm edip mezbûr Ali ile beynimizde şikāk vâki‘ olmağın zimmetinde mütekarrir olan altı yüz akçe mehr-i müeccelimden ve nafaka-i iddet-i mu‘ayyene ve me’ûnet-i süknâmdan fâriğa olmak üzre zevcim mezbûr Ali ile muhâla‘a eyleyip zevciyyete müte‘allik âmme-i de‘âvî ve mütâlebât ve eymân ve muhâsamâtdan zimmetini ibrâ-i âmm-ı kātı‘ü’n-nizâ‘la ibrâ ve iskāt-ı tâm ve râfi‘ü’l-hisâm birle iskāt eyledim deyicek mezbûr Ali dahi meclis-i mezbûrda zevcim mezbûre Mülâyim ile minvâl-i muharrer üzre olan hul‘-ı mezbûru ben dahi kabûl eyleyip zevciyyete müte‘allik kâffe-i de‘âvî ve mütâlebât ve eymân ve muhâsamâtdan mezbûre Mülâyim’in zimmetini ibrâ ve iskāt eyledim min ba‘d birbirimiz ile vechen mine’l-vücûh da‘vâ ve nizâ‘ımız yokdur deyicek ahadühümâ âharın kelimât-ı meşrûhasını vicâhen tasdîk ve şifâhen tahkīk etmeğin mâ cerâ kayd şüd. Fi’l-yevmi’r-râbi‘ aşer min Zilhicceti’l-harâm li sene isneteyn ve seb‘în ve elf. Şuhûdü’l-hâl: Mustafa Efendi imâm-ı mahalle-i mezbûre, Veli Beşe b. Ali el-Bostânî, Hüseyin b. Abdullah, Hüseyin muhzır ve gayruhüm mine’l-hâzırîn.