Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 418 Hüküm no: 444 Orijinal metin no: [95b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Paşa’nın mirasının oğulları Mehmed Çelebi ve Eyüb Çelebi’ye ait olduğu Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Ali Paşa mahallesinde sâkin iken bundan akdem vefât eden kahveci Hasan Paşa demekle ma‘rûf müteveffânın verâseti, sulbî kebîr oğulları Mehmed Çelebi ve Eyüb Çelebi’ye münhasıra olduğu şer‘an zâhir ve müte‘ayyin oldukdan sonra mezbûr Mehmed Çelebi meclis-i şer‘de karındaşı hâmilü’l-kitâb merkūm Eyüb Çelebi mahzarında bi tav‘ihî ikrâr ve takrîr-i kelâm edip hazret-i müşârün-ileyh evkāfından olup medîne-i mezbûrede Haffâflar mukābelesinde vâki‘ Üstâd Mehmed dükkânı demekle ma‘rûf bir bâb ve imâret mukābelesinde vâki‘ musluk önünde köşede olan bir bâb ki cem‘an iki bâb hallâk dükkânı ve hamam kurbunda vâki‘ bir bâb ve yoğurtçular mukābelesinde vâki‘ bir bâb ki cem‘an iki bâb attâr dükkânı icâre-i mu‘accele ve müeccele-i ma‘lûmeteyn ile ile’l-vefât babam müteveffâ-yı mezbûrun zabt ve taht-ı icâresinde olup ba‘de vefâtihî zikr olunan dört bâb dükkânlar intikāl-i âdî ile bana ve karındaşım mezbûr Eyüb Çelebi’ye intikāl edip defter-i vakıfda dahi ikimizin üzerine kayd olunup temessük olunmuşdur. Karındaşım mezbûr Eyüb Çelebi zikr olunan dört bâb dükkânları murâd ederse bey‘ edip hakk-ı ferâğlarını münâsafa üzre beynimizde tevzî‘ ve taksîm olunsun ve eğer murâd ederse sâlifü’z-zikr dört bâb dükkânların kirâlarını beynimizde tansîf oluna deyicek vâki‘ü’l-hâl hıfzan li’l-makāl mezbûr Eyüb Çelebi talebiyle ketb olundu. Fi’l-yevmi’l-hâmis min Zilhicceti’ş-şerîfe li sene isneteyn ve seb‘în ve elf. Şuhûdü’l-hâl: Hamza Efendi b. Hasan el-Kadı, Mustafa Efendi el-Kadı, eş-Şeyh İlmüddin el-İmâm, Ahmed b. Emrullah, Mehmed b. Mahmud ve gayruhüm mine’l-hâzırîn