Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 317 Hüküm no: 357 Orijinal metin no: [48b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Roso v. Yorgo’nun, İbrahim b. el-Hâc İbrahim ile Sefer b. Mehmed’den inek bahasından alacaklı olduğu Sürekçi tâifesinden Roso v. Yorgo nâm zimmî meclis-i şer‘-i hatîr-i lâzımü’t-tevkīrde İbrahim b. el-Hâc İbrahim ve Sefer b. Mehmed nâm şerîkleri mahzarında üzerine da‘vâ ve takrîr-i kelâm edip merkūmân İbrahim ve Sefer her bir re’si altışar tamâm ve birer rub‘ esedî guruşa olmak üzre altmış yedi buçuk esedî guruşa on re’s kara sığır ineğini bey‘ ve teslîm anlar dahi ber vech-i iştirâk iştirâ ve tesellüm ve kabûl ettiklerinden sonra mukaddemâ merkūmân İbrahim ve Sefer yedlerinde meblağ-ı mezbûrun kırk tamâm ve bir rub‘ esedî guruşunu ahz u kabz edip yirmi yedi tamâm ve bir rub‘ esedî guruşu zimmetlerinde kalmış idi hâlâ meblağ-ı mezbûru merkūmândan taleb ederim suâl olunsun dedikde gıbbe’s-suâl merkūmân İbrahim ve Sefer cevâblarında fi’l-hakīka vech-i muharrer üzre müdde‘î-i merkūm Roso’ya semen-i mezbûrdan bâkī zimmetimizde lâzımü’l-edâ yirmi yedi tamâm ve bir rub‘ esedî guruş deynimiz vardır deyû ikrâr eylediklerinde mûcebince meblağ-ı mezbûru müdde‘î-i merkūma edâ ve teslîme merkūmân İbrahim ve Sefer’e tenbîh birle mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ ve’l-ışrîn min Cumâdelâhire li sene seb‘a ve seb‘în ve elf. Şuhûdü’l-hâl: Mehmed Çelebi b. Abdülmennân Kethüdâ-yı muhzırân, Gazanfer Bey b. Tevekkül, Baba Resul b. Rıdvan, Mehmed b. Rıdvan ve gayruhüm mine’l-huzzâr.