Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 419 Hüküm no: 445 Orijinal metin no: [95b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma Hatun bt. Ahmed’in menzilini Cafer Bey b. Abdullah’a satması Medîne-i Hazret-i Eyyûb el-Ensârî -dâme fî rıdvâni’l-Bârî-’de Kara Süleyman Çelebi mahallesi sâkinelerinden Fâtıma Hâtun bt. Ahmed tarafından bey‘-i âti’z-zikri ve kabz-ı semeni ikrâra vekîl olup mezbûrenin zâtını ma‘rifet-i şer‘iyye ile ârifân olan İsmail Çelebi b. Hasan nâm vekîl meclis-i şer‘de işbu sâhibü’l-kitâb Cafer Bey b. Abdullah mahzarında bi’l-vekâle ikrâr ve takrîr-i kelâm edip akd-i âti’z-zikrin sudûruna değin müvekkilim mezbûrenin silk-i mülk-i sahîhinde münselik olan emlâkinden mahalle-i mezbûrede vâki‘ bir tarafdan el-Hâc Abdurrahman mülkü ve bir tarafdan Ömer Reis mülkü ve ba‘zan Hüseyin b. İsâ mülkü ve bir tarafdan Şaban Bey mülkü ve bir tarafdan tarîk-i hâs ile mahdûd iki bâb fevkānî oda ve bir sofa ve iki bâb tahtânî oda ve bir sofa ve kenîfi ve mezbûr Ömer Reis ile müşterek su kuyusunu ve zât eşcâr-ı müsmire ve gayr-ı müsmire bahçeyi müştemil mülk menzilini bi cümleti’t-tevâbi‘ ve’l-levâhık mezbûr Cafer Bey yirmi dokuz bin beş yüz fıddî nakd-i râyic fi’l-vakt akçeye müvekkilem mezbûre tarafeynden îcâb ve kabûlü hâvî bey‘-i bâtt-ı sahîh-i şer‘î ile bâtten bey‘ ve teslîm, ol dahi ber minvâl-i muharrer iştirâ ve tesellüm ve kabz ve kabûl eyledikden sonra semeni olan mezbûrü’n-na‘t yirmi dokuz bin beş yüz akçeyi bi’t-tamâm ve’l-kemâl müvekkilem mezbûre Fâtıma Hâtun müşterî-i merkūm Cafer Bey yedinden tamamen alıp kabz edip menzil-i mahdûd-ı mezkûrda vechen mine’l-vücûh alâkam kalmadı ba‘de’l-yevm müşterî-i merkūm Cafer Bey’in mülk-i mahz-ı müşterâsı ve hakk-ı sarîhidir. Keyfe mâ yeşâ’ mutasarrıf olsun dedi dedikde gıbbe’t-tasdîki’l-mu‘teber mâ cerâ kayd şüd. Fi’l-yevmi’s-sâmin (min) Zilhicceti’l-harâm li sene isneteyn ve seb‘în ve elf. Şuhûdü’l-hâl: Mahmud Efendi el-İmâm, Veli Çelebi el-Müezzin, Süleyman Bey b. Abdullah, Mehmed Bey b. Ahmed, Musli b. Osman, Hasan b. Mehmed, Mehmed Efendi b. Süleyman ve gayruhüm mine’l-hâzırîn.