Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 420 Hüküm no: 446 Orijinal metin no: [95b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dimo v. Yorgi ve İstoyan oğlu Yuvan’ın peynir satışında İbrahim Beşe b. Resul ile anlaştıkları Havâss-ı Aliyye kazâsı a‘mâlinden Büyükçekmece nâhiyesine tâbi‘ Moha nâm karye yaylağında işbu târih-i kitâb senesi koyun yayladıp, çandile peyniri demekle ma‘rûf peynir işleyen Dimo v. Yorgi ve şerîki İstoyan oğlu Yuvan nâm zimmîler meclis-i şer‘-i hatîr-i lâzımü’t-tevkīrde medîne-i Hazret-i Ebâ Eyyûb el-Ensârî -dâme [fî] rıdvâni’l-Bârî-’de sâkin olup işbu sene dil peyniri işleyen sâhibü’l-kitâb Pirinçci İbrahim Beşe b. Resul nâm kimesne mahzarında bi’t-tav‘i’s-sâf ikrâr ve i‘tirâf edip zikr olunan Moha yaylağında olan koyunlarımız sütünden hâsıl olan çandile peynirimizi işbu târih-i kitâb şehri Ramazânü’l-mübâreki gurresinden târih-i mezbûr Şevvâli’l-mükerremi’nin altıncı gününe değin beher vakıyyesi yedişer akçeye ve Şevvâl’in altıncı gününden peynir-i âhar olunca altışar akçeye olmak üzre narh-ı rûzî üzre kadrini beynimizde ilm-i şer‘î birle ma‘lûm çandile peynirimizi mezbûr İbrahim Beşe’ye bey‘ ve teslîm, ol dahi vech-i muharrer üzre iştirâ ve tesellüm ve kabz ve kabûl eylemişdir semeni olan meblağ-ı mezbûru hesâb-ı merkūm üzre haklaşmak için beynimizde cârî olan ikrâr ve tasdîkimiz sicil ve hüccet olunmak matlûbumuzdur dediklerinde merkūm İbrahim Beşe dahi mukırrân-ı mezbûrânı tasdîk ve kabûl etmeğin vâki‘ü’l-hâl kayd şüd. Fi’l-yevmi’s-sâmin min Zilhicceti’l-harâm li sene isneteyn ve seb‘în ve elf. Şuhûdü’l-hâl: El-Hâc Hüseyin el-Muhtesib, Eyüb Çelebi b. Mehmed el-Mukayyid, Ali Beşe b. Emrullah, Himmet Beşe b. Mehmed, el-Hâc Abdullah ve gayruhüm mine’l-hâzırîn.