Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 421 Hüküm no: 447 Orijinal metin no: [96a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kiremitçi Ahmed Çelebi Vakfı’ndan hissesine isabet eden miktarın Abdi Çelebi’nin vekiline teslimi Havâss-ı Aliyye kazâsına tâbi‘ kasaba-i Hasköy’de câmi‘-i şerîfi olan Kiremitçi Ahmed Çelebi evlâdı evlâdının evlâdından olup vilâyet-i Anadolu’da Mihaliç kazâsı a‘mâlinden Kirmasti kasabasında sâkin olan Abdi Çelebi tarafından meblağ-ı âti’z-zikri taleb ve da‘vâ ve ahz ü kabz ve kendisine îsâle ve inde’l-hâce lede’l-hükkâmi’l-kirâm mürâfa‘a ve muhâsamaya ve kabz ve îsâle mütevakkıf olduğu umûrun küllîsine vekîl olup hasm-ı şer‘î-i câhid mahzarında Mehmed Bey b. Ebûbekir ve diğer Mehmed b. Hüseyin şehâdetleri ile şer‘an vekâleti sâbite olan Mustafa Ağa b. Sinan nâm vekîl mahfil-i kazâda merhûm-ı mezbûrun evkāfına meşrûtiyyet üzre bi’l-fi‘l mütevellî olan Mehmed Çavuş b. Ebûbekir mahzarında üzerine bi’l-vekâle takrîr-i da‘vâ edip merhûm-ı mezbûr vakfının gallâtının mesârif-i mu‘ayyeneden fazlası li’z-zekeri mislü hazzi’l-ünseyeyn evlâdına ve evlâd-ı evlâdına ve evlâd-ı evlâd-ı evlâdına şart ve ta‘yîn ve vakfiye-i ma‘mûlün-bihâsında tahrîr ve tastîr ettirmeğin hâlâ evkāf-ı mezbûre mütevellîsi olan mezbûr Mehmed Çavuş evkāf-ı mezbûre müstagallâtından kasaba-i mezbûrede vâki‘ inde’l-ahâlî ma‘lûmetü’l-hudûd olup hâlâ mahlûl olmağla vilâyet-i Anadolu’da medîne-i Tire’de sâkin ( ) nâm kimesneye îcâr eylediği Kiremithâne hissesinin icâre-i mu‘accelesi için vakıf için kabz eylediği beş bin akçeden hâkim-i muvakki‘-i sadr-ı kitâb huzûrunda hesâb ve kitâb olunup şart-ı vâkıf üzre her bir evlâd-ı ricâl-i kebîr bin altı yüz altmış altı akçe ve her bir evlâd-ı inâsa sekiz yüz otuz üç akçe isâbet ve intikāl etmişiken mütevellî-i vakf-ı mezbûr müvekkilim mezbûr Abdi Çelebi hissesine isâbet eden bin altı yüz altmış altı akçeyi müvekkilim mezbûr için bana teslîmde ta‘allül eder hâlâ suâl olunup alıverilmek matlûbumdur deyicek gıbbe’s-suâl mütevellî-i mezbûr cevâbında fi’l-vâki‘ hâlâ bâlâda bast ve tahrîr olunan minvâl üzre olmuşdur deyû bi’t-tav‘ihî ikrâr ve i‘tirâf etmeğin alâ mûcebi ikrârihî zikr olunan bin altı yüz altmış altı akçeyi müvekkil-i mezbûr için şart-ı vâkıf üzre vekîl-i merkūm Mustafa Ağa’ya edâ ve teslîme tenbîh-i şer‘î birle mâ hüve’l-vâki‘ bi’t-taleb ketb olundu. Fi’l-yevmi’s-sâlis ve’l-ışrîn min Zilka‘deti’ş-şerîfe li sene isneteyn ve seb‘în ve elf. Şuhûdü’l-hâl: Mustafa Çavuş b. İbrahim, es-Seyyid Mustafa Çelebi b. es-Seyyid Mehmed, Ali Beşe b. Emrullah, Hüseyin b. Hasan ve gayruhüm mine’l-hâzırîn.