Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 421 Hüküm no: 448 Orijinal metin no: [96a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mikayil v. Hücemir’in, Süleyman Ağa b. Ramazan aleyhindeki bağ ve menzil davasında sulh olması Fi’l-asl vilâyet-i Anadolu’da kasaba-i Eğin zimmîlerinden olup hâlâ mahmiye-i İstanbul’da mütemekkin olan Mikayil v. Hücemir nâm Ermeni meclis-i şer‘de fahrü’l-emâsil ve’l-eşbâh bâ‘isü’l-kitâb Süleyman Ağa b. Ramazan mahzarında ikrâr ve takrîr-i kelâm edip kasaba-i mezbûre mahallâtından Kızılca mahallesinde sâkin iken bundan akdem mürd olan babam merkūm Hücemir ve ammim Bedros ve Budak nâm Ermenilerin ale’l-iştirâki’s-seviy mülkleri olup kasaba-i mezbûre bağları dâhilinde vâki‘ lede’l-ahâlî ve’l-cîrân ma‘lûmetü’l-hudûd bir kıt‘a mülk bağda olan sülüsân hisse-i şer‘iyye-i şâyi‘alarını ammim merkūm Bedros ile mesfûr Budak mûmâ-ileyh Süleyman Ağa fuzûlen zabt ve tasarruf üzre iken babam merkūm hâlik olup verâseti bana münhasıra olup bağ-ı mezbûrda olan sülüs hissesi dahi bi’l-irsi’ş-şer‘î bana isâbet ve intikāl etmeğin ben dahi zikr olan sülüs hisse bağı mûmâ-ileyh Süleyman Ağa’dan taleb ve da‘vâ eylediğimde mûmâ-ileyh Süleyman Ağa dahi sene selâse ve isneteyn ve elf Recebü’l-ferdi’nin yirmi beşinci günü ammim merkūm Bedros kendi tarafından asâleten ve babam hâlik-i mezbûr tarafından vekâleten ve mersûm Budak dahi asâleten mahalle-i mezbûrede vâki‘ bir tarafdan Bektaş mülkü ve bir tarafdan Şirvan oğlu mülkü ve bir tarafdan Bozacıoğlu Agop mülkü ve bir tarafdan tarîk-i âm ile mahdûd eşcâr-ı müsmire ve gayr-ı müsmireyi müştemil olup ale’l-iştirâki’s-seviy mülkleri olan menzili ve lede’l-ahâlî ve’l-cîrân ma‘lûmü’l-hudûd sâlifü’z-zikr bir kıt‘a bağı bana altı yüz kıt‘a riyâlî guruş-ı kebîre tarafeynden îcâb ve kabûlü hâvî bey‘-i bâtt-ı sahîh-i kat‘î ile bey‘ ve bi’l-asâle ve bi’l-vekâle kabz-ı semen ve mebî‘-i mezbûru mahallinde zabt ve tasarrufa beni taraflarından taslît eylediklerinde ben dahi iştirâ ve kabûl ve târih-i mezbûrda mahmiye-i İstanbul’da Davudpaşa mahallesinde nâibü’ş-şer‘ olan İbrahim Efendi huzûrunda ikrârları sicil ve hüccet olmağın menzil-i mezbûr ve bağ-ı merkūmu mülk-i müşterâm olmak üzre zabt ve tasarruf ederim deyû cevâb ve takrîrine muvâfık hüccet-i şer‘iyye ibrâz etmeğin beynimizde münâza‘ât-ı kesîre cereyân etmişidi el-hâletü hâzihî beynimize muslihûn tavassut edip da‘vâ-yı mezkûrumdan mûmâ-ileyh Süleyman Ağa kasr-ı yed ve bana teslîm etmek üzre inşâ-i akd-i sulh eylediklerinde her biri sulh-i mezbûru kabûl ve mûmâ-ileyh Süleyman Ağa dahi zikr olunan bağın merkūm Bektaş mülküne muttasıl olan tarafından altı hissede bir hissesinden kasr-ı yed ve mahallinde kabz ve zabt ve tasarrufa beni tarafından taslît etmeğin ben dahi kabûl ve da‘vâ-yı mezkûrumdan mûmâ-ileyh Süleyman Ağa’nın zimmetini ibrâ ve iskāt eyledim min ba‘d mûmâ-ileyh Süleyman Ağa ile husûs-ı mezbûra müte‘allika da‘vâ ve nizâ‘ım yokdur, zuhûr dahi eder ise lede’l-hükkâm mesmû‘a olmasın deyicek gıbbe’t-tasdîk mâ hüve’l-vâki‘ bi’t-taleb kayd şüd. Fi’l-yevmi’s-sânî aşer min Zilhicceti’ş-şerîfe min şühûr sene isneteyn ve seb‘în ve elf. Şuhûdü’l-hâl: Umdetü’l-müderrisîni’l-kirâm Abdülbâkī Efendi eş-şehîr bi Uşşâkīzâde, Osman Çavuş b. el-Hâc Evren el-Mübâşir, Mustafa b. Abdülkerim, Mustafa b. Ali, Ahmed Ağa b. Murad, Sâlih Çelebi b. Mustafa, Hamza Efendi nâib-i recül, Mehmed Beşe b. Musli ve gayruhüm mine’l-hâzırîn.