Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 423 Hüküm no: 449 Orijinal metin no: [96b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dimitri v. Riga’nın Kalo v. Pavli’nin zimmetini ibrâ etmesi Fi’l-asl vilâyet-i Rumeli’nde medîne-i İlbasan’dan olup hâlâ mahmiye-i İstanbul’da mütemekkin olan Dimitri v. Riga nâm zimmî meclis-i şer‘-i hatîr-i lâzımü’t-tevkīrde işbu bâ‘isü’l-vesîka Kalo v. Pavli nâm zimmî muvâcehesinde bi’t-tav‘i’s-sâf ikrâr ve takrîr-i kelâm edip medîne-i mezbûrede vâki‘ lede’l-ahâlî ve’l-cîrân ma‘lûmetü’l-hudûd olup bundan akdem silk-i mülk-i sahîhimde münselik olan mülk menzilimi semen-i misli ile bey‘ ve teslîm ve kabz-ı semen ve bana îsâle mukaddemâ merhûm Kalo’yu tarafımdan tevkîl eylediğimde ol dahi vekâlet-i mezbûreyi kabûl ve vekâleti hasebiyle zikr olunan menzilimi yedi bin dört yüz elli nakd-i râyic fi’l-vakt akçeye bey‘ ve teslîm ve semeni olan mezbûrü’n-na‘t yedi bin dört yüz elli akçeyi bi’l-vekâle alıp kabz edip hâlâ meblağ-ı mezbûru vekîl-i mezbûr yedinden bi’t-tamâm ve’l-kemâl alıp kabz edip zimmetinde menzil-i merkūm semeni olan mârrü’z-zikr yedi bin dört yüz elli akçeden bir akçe hakkım bâkī kalmadı. Min ba‘d menzil-i mezbûra ve semenine müte‘allik vekîl-i mezbûr ile da‘vâ ve nizâ‘ım yokdur deyicek gıbbe’t-tasdîki’l-mu‘teber mâ cerâ bi’t-taleb ketb olundu. Fi’l-yevmi’s-sânî aşer min Zilhicceti’l-harâm li sene isneteyn ve seb‘în ve elf. Şuhûdü’l-hâl: Ali b. Hasan el-Hayyât, Mehmed Beşe b. Musli, el-Hâc Ali, Ali Hâce el-Müezzin, Süleyman b. Mustafa ve gayruhüm mine’l-hâzırîn.