Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 423 Hüküm no: 450 Orijinal metin no: [96b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kötü halleri sebebiyle Ali b. Abdullah ve eşi Sâliha’nın mahalleden çıkartılması Medîne-i Hazret-i Ebâ Eyyûb el-Ensârî -dâme rıdvânü’l-Bârî-’de Kiremitçi Süleyman mahallesi sâkinlerinden olup yine mahalle-i mezbûre mescidi evkāfına bi’l-fi‘l mütevellî olan Mehmed Çelebi b. Ahmed ve mahalle-i mezbûre müezzini el-Hâc Ebûbekir Dede b. Mehmed ve ahâlî-i mahalle-i mezbûrdan İslâm b. Abdullah ve Mehmed Beşe b. Abdullah ve Mustafa b. Sâlih nâm kimesneler ve sâirleri bi isrihim meclis-i şer‘a, yine mahalle-i mezbûr ahâlîsinden Ali b. Abdullah nâm kimesneyi ihzâr ve mahzarında her biri takrîr-i kelâm ve ta‘bîr ani’l-merâm edip mezbûr Ali zevcesi gāibetü’l-meclis Semîne Sâliha demekle [ma‘rûf] hâtun nâ-mahremden tehâşîleri olmayıp merhûm-ı mezbûrun mescid-i şerîfi kurbunda vâki‘ müte’ehhilîn odalarında hâlâ sâkin oldukları odaya kendilerine nâ-mahrem olan ba‘zı er ve avratı getirip fısk-ı fücûr ettirdiler bundan akdem merkūm ve zevcesi mezbûreye bi’d-defe‘ât tenbîh eylediğimizde mütenebbih olmadıkları ecilden mahalle-i mezbûrdan ihrâclarına kıbel-i şer‘den dahi tenbîh olunmuşken, hâlâ yine ke’l-evvel fesâd ve şenâ‘atden hâlî değillerdir fi’l-hakīka mezbûr Ali mahalle-i merkūmede bu hâl üzre bir nice zamân kalırsa bir fesâd-ı azîm olmak emr-i mukarrer ve muhakkakdır mezbûr Ali’nin zevcesi merkūme Sâliha’[nın] mahalle-i mezbûreden ihrâcları için kıbel-i şer‘den tenbîh olunmak matlûbumuzdur dediklerinde fi’l-vâki‘ mezbûr Ali ve zevcesi mezbûrenin hâlleri ve nâ-mahremden tehâşîler olmadığı ihbâr-ı sikāt ile müte‘ayyin olmağın min ba‘d mahalle-i mezbûreden ihrâclarına kıbel-i şer‘den tenbîh birle mâ hüve’l-vâki‘ bi’t-taleb kayd şüd. Fi’l-yevmi’r-râbi‘ aşer min Zilhicceti’ş-şerîfe li sene isneteyn ve [seb‘în] ve elf. Şuhûdü’l-hâl: Mustafa Çelebi b. Pervâne, Mehmed b. Mahmud, Ali Beşe b. Abdullah, Mehmed Çelebi b. Musli, Hüseyin Muhzır ve gayruhüm mine’l-hâzırîn.