Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 424 Hüküm no: 451 Orijinal metin no: [96b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kaloyani v. Baratan’ın bağını içindeki mahsulü ile Kozma v. Rupa’ya satması Vilâyet-i Rumeli’nde Göllükesri kazâsına tâbi‘ Mavrud nâm karyede sâkin Kaloyani v. Baratan nâm zimmî meclis-i şer‘-i hatîr-i lâzımü’t-tevkīrde. işbu râfi‘ü’s-sifri’ş-şer‘î Kozma v. Rupa nâm zimmî muvâcehesinde ikrâr ve takrîr-i kelâm edip bey‘-i câ’i’z-zikrin sudûruna değin silk-i mülk-i sahîhimde münselik olan emlâkimden olup karye-i mezbûre hudûdu dâhilinde vâki‘ bir tarafdan Yani Forti bağı ve bir tarafdan Zali nâm zimmî bağı ve iki tarafdan tarîk-i âm ile [mahdûd] tahmînen sekiz dönüm bir kıt‘a mülk bağımı hâlâ içinde mevcûd olan mahsûlü ile merkūm Kozma’ya tarafeynden [îcâb] ve kabûlü hâvî bey‘-i bâtt-ı sahîh-i şer‘î ile on iki bin iki yüz nakd-i râyic fi’l-vakt akçeye bey‘, ol dahi vech-i muharrer üzre iştirâ ve kabûl eyleyip semeni olan mezbûrü’n-na‘t on iki bin iki yüz akçeyi müşterî-i [merkūm] Kozma yedinden tamamen alıp kabz eylediğimden sonra sâlifü’z-zikr bir kıt‘a bağı mevcûd olan mahallinde zabt ve tasarrufa tarafımdan merkūm Kozma’yı taslît eyledim min ba‘d bağ-ı mahdûd-ı mezkûrda benim vechen [mine’l-vücûh] alâka ve medhalim yokdur. Merkūm Kozma’nın mülk-i müşterâsıdır. Keyfe mâ yeşâ’ mutasarrıf olsun dedikde gıbbe’t-[tasdîk] mâ hüve’l-vâki‘ kayd şüd. Fi’l-yevmi’t-tâsi‘ min Zilhicceti’ş-şerîfe li sene isneteyn ve seb‘în ve elf. Şuhûdü’l-hâl: Resul b. Osman, İbrahim b. Ahmed, Sâlih b. Musli, Ali b. Emrullah, Ahmed b. Süleyman, Hüseyin b. Hasan, Yani v. Hrista, Rali v. Ergiri, Ezmanak v. Yuvan, Nastak v. Baratan, diğer Rali v. Nastak ve gayruhüm mine’l-hâzırîn.