Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 38 Hüküm no: 2 Orijinal metin no: [1a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Paşa mahallesi sakinelerinden Hatice Hatun’un veraseti Ali Paşa mahallesinde sâkine iken bundan akdem vefât eden Tireli Hatice bt. Abdullah nâm hâtunun verâseti zevci Mehmed Bey b. Hasan nâm kimesne ile li ebeveyn kız karındaşları Aynişah ve Meryem bt. Abdi’ye münhasıra idiği medîne-i Hazret-i Ebâ Eyyûb el-Ensârî -dâme fî rıdvâni’l-Bârî- de Ali Paşa mahallesi sâkinelerinden iken bundan akdem vefât eden Tireli Hatice bt. Ali nâm hâtunun verâseti zevci Mehmed Bey b. Hasan ile li ebeveyn kız karındaşı kızları Aynişah ve Meryem bintey Abdi’ye münhasıra olduğu şer‘an zâhir ve mütebeyyin oldukdan sonra mezbûretân Aynişah ve Meryem taraflarından husûs-ı âti’z-zikre vekîl olup vekâleti hasm-ı şer‘î-i câhid mahzarında mezbûretânın zâtları[nı] ma‘rifet-i şer‘iyye ile ârifân olan Mustafa b. Osman ve Yusuf Efendi b. Mehmed şehâdetleriyle şer‘an sâbite olan Abdürrezzak b. Ahmed nâm vekîl meclis-i şer‘de müteveffât-ı mezbûrenin zevci râfi‘ü’l-kitâb mezbûr Mehmed Bey mahzarında bi’l-vekâle üzerine da‘vâ ve takrîr-i kelâm edip müteveffât-ı mezbûre Hatice’nin muhallefâtından üç sepet sandığı ve üç güğüm ve iki yan keçesi ve üç kilim ve on döşek ve on yorgan ve on yastık ve bir çift altın bilezik ve bir altın küpe ve bir sîm kuşakdan nısfı müvekkilelerim mezbûretân Aynişah ve Meryem’e ve nısf-ı âharı merkūm Mehmed Bey’e isâbet ve intikāl etmeğin mezbûr Mehmed Bey hâlâ eşyâ-yı merkūmenin cümlesini ahz u kabz etmişdir. Suâl olunup takrîr tahrîr olunmak murâdımdır dedikde gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı acz ile istihlâf etmeğin mezbûr Mehmed Bey zikr olunan eşyâları ahz u kabz ve bir tarîkle ketm ve ihfâ etmediğine yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-a‘lâ etmeğin vekîl-i mezbûr Abdürrezzak mezbûr Mehmed Bey’e bilâ beyyine mu‘ârazadan men‘ birle mâ vaka‘a bi’t-taleb kayd şud. Fî 9 min Şa‘bân sene 1081. Şuhûdü’l-hâl: Ali Bey b. Halil, Hüseyin Çelebi, Ahmed b. Emrullah, İbrahim Beşe b. Hasan, İsmail Çelebi b. İbrahim, Mustafa Efendi, Abdurrahman Efendi, Eyüb Efendi, Hüseyin Çelebi Serbölük, Muhzır Dilaver.