Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 318 Hüküm no: 358 Orijinal metin no: [49a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa b. İbrahim’in, buğday bahasından el-Hâc Mehmed b. İsmail’den alacaklı olduğu Mahmiye-i İstanbul’da ( ) mahallesinde sâkin Mustafa b. İbrahim nâm kimesne meclis-i şer‘-i şerîfde el-Hâc Mehmed b. İsmail nâm kimesne mahzarında üzerine da‘vâ ve takrîr-i kelâm [edip] bundan akdem yedimde müşterâ ve makbûz her keyli ellişer akçeye olmak üzre elli keyl buğday bahâsından merkūm el-Hâc Mehmed zimmetinde iki bin beş yüz akçe hakkım vardır suâl olunup meblağ-ı mezbûr merkūm el-Hâc Mehmed’den alıverilmesi matlûbumdur dedikde gıbbe’s-suâl mezbûr el-Hâc Mehmed cevâbında fi’l-vâki‘ minvâl-i muharrer üzre mersûm Mustafa yedinde müşterâ ve makbûz her keyli ellişer akçeye olmak üzre elli keyl buğday bahâsında zimmetimde iki bin beş yüz akçe merkūm Mustafa’ya lâzımü’l-edâ deynim vardır deyû ikrâr ve i‘tirâf etmeğin alâ mûcebi ikrârihî meblağ-ı mezbûr iki bin beş yüz akçeyi mezbûr Mustafa’ya edâya merkūm el-Hâc Mehmed’e tenbîh birle mâ vaka‘a bi’t-taleb ketb olundu. Fi’s-sâlis min Recebi’l-ferd li sene seb‘a ve seb‘în ve elf. Şuhûdü’l-hâl: Şükrullah Bey b. Mustafa, Abdi Çelebi b. Hüseyin, Receb Çelebi, İbrahim Çelebi b. Mehmed, Baba Resul b. Rıdvan ve gayruhüm mine’l-hâzırîn.