Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 40 Hüküm no: 4 Orijinal metin no: [2a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Paşa mahallesinde vefat eden Tireli Hatice Hanım’ın veraset davasında haksız taleplerin reddi Ali Paşa mahallesi sâkinelerinden iken bundan akdem vefât eden Tireli Hatice bt. Ali nâm hâtunun verâseti zevci Mehmed Bey b. Hasan ile li ebeveyn kızkarındaşı kızları Aynişah ve Meryem bintey Abdi’ye münhasıra idiği hâkim-i muvakki‘-i sadr-ı kitâb indinde olan Abdullah b. Abdullah ve Devlethân b. Mahmud şehâdetleriyle [şer‘an] sâbit ve zâhir oldukdan sonra mezbûretân taraflarından husûs-ı âti’z-zikre vekîl olup hasm-ı şer‘î-i câhid mahzarında mezbûretânın zâtlarını ma‘rifet-i şer‘iyye ile ârifân olan Mustafa b. Osman ve Yusuf Efendi b. Mehmed şehâdetleri ile şer‘an [vekâleti] sâbite olan Abdürrezzak b. Ahmed nâm vekîl mahfil-i kazâda müteveffât-ı mezbûrenin zevci işbu sâhibü’l-kitâb Mehmed Bey b. Hasan mahzarında üzerine bi’l-vekâle takrîr-i da‘vâ edip müteveffât-ı mezbûre Tireli Hatice’nin zevci mezbûr Mehmed Bey zimmetinde mütekarrir ve ma‘kūdun-aleyh altı bin fıddî râyic fi’l-vakt akçeden müvekkilelerim merkūmetâna irsen intikāl eden nısfı üç bin akçeyi müvekkilelerim mezbûretân için bi’l-vekâle taleb eylediğimde teslîmde ta‘allül eder. Suâl olunup alı verilmek murâdımdır deyicek gıbbe’s-suâl mezbûr Mehmed Bey cevâbında zevcem müteveffât-ı mezbûrenin benim zimmetimde ancak iki bin akçe mehr-i müecceli olup mezbûrun bin akçesini huzûr-ı müslimînde bana hibe ve teslîm ve temlîk ben dahi ittihâb ve kabûl eylemişdim. Bin akçesini dahi techîz ve tekfînine harc ve sarf etmek üzre vasiyyet edip ba‘de vefâtihâ vasiyyet-i merkūma binâen harc ve sarf eylemişdir deyicek gıbbe’s-suâl ve akībe’l-inkâr mezbûrdan ziyâdeyi mübeyyine beyyine taleb olundukda ityân-ı beyyineden izhâr-ı acz ile istihlâf etmeğin merkūm Mehmed Bey’e zevcesi müteveffât-ı mezbûrenin zimmetinde ikrâr eylediği iki binden ziyâde olmadığına yemîn teklîf olundukda ol dahi alâ vefki’l-mes’ûl yemîn billâh eyledikden sonra zikr-i sâbık iki bin akçenin bin akçesini kendiye hibe ve bin akçesini minvâl-i muharrer üzre vasiyyet eylediğini mübeyyine beyyine taleb olundukda udûl-i ricâlden mahalle-i mezbûrede sâkin İbrahim b. Hüseyin ve Ahmed b. Emrullah li ecli’ş-şehâde makām-ı kazâya hâzırân olup istişhâd olundukda fi’l-vâki‘ müteveffât-ı mezbûre hâl-i hayâtında bizim huzûrumuzda zevci Mehmed Bey’e zimmetinde mütekarrir iki bin akçe mehr-i müeccelinin bin akçesini zevc-i mezbûra hibe ve temlîk ol dahi ittihâb ve temellük ve kabûl ve bin akçesini dahi ba‘de vefâtihî techîz ve tekfînine harc ve sarf olunmak üzre vasiyyet ve musırraten fevt oldu deyû biz bu husûsa şâhidleriz dediklerinde ba‘de’t-ta‘dîl ve’t-tezkiye kabûl ve mûcebiyle bî-vech mu‘ârazadan men‘. Fî 9 min Şa‘bân sene 1081. Şuhûdü’l-hâl: Sâbikūn.