Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 42 Hüküm no: 6 Orijinal metin no: [2b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Araba kazasından dolayı tazminata hüküm Dergâh-ı âli -dâme mahfûfen bi’l-me’âlî- bevvâblarından Mustafa Bey nâm bevvâb-ı sultânî meclis-i şer‘de Havâss-ı Aliyye kazâsı muzâfâtından Kömürcü Belgrad karyesi zimmîlerinden işbu sâhibü’l-vesîka Yamandi v. Marko muvâcehesinde ikrâr ve takrîr-i kelâm edip târih-i kitâbdan iki gün mukaddem arabasını çekip giderken medîne-i Hazret-i Ebâ Eyyûb el-Ensârî -dâme fî rıdvâni’l-Bârî-de bu Arabacılar Çarşısı’na geldiğinde işbu hâzır bi’l-meclis sulb-i sagīr oğlu Ahmed’i çiğnetip başının sol tarafından alnı üstüne sıyırıp mecrûh etmekle mûcib-i şer‘îsini icrâ için da‘vâ eylediğimde merkūm Yamandi husûs-ı mezkûru vesâtat-ı muslihîn ile da‘vâ-yı mezkûrumdan beni üç yüz fıddî râyic fi’l-vakt akçe üzerine inşâ-i akd-i sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr üç yüz akçeyi yedinden ahz u kabz eyledim husûs-ı mezbûra müte‘allik âmme-i de‘âvîden mezbûr Yamandi’nin zimmetini ibrâ ve iskāt eyledim dedikde gıbbe’t-tasdîk kayd şud. Fî 10 Şa‘bân sene [10]81. Şuhûdü’l-hâl: Ahmed b. Hüseyin, Şaban b. er-Râcil, Mahmud el-Hallâk, Hasan b. Ali.