Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 43 Hüküm no: 9 Orijinal metin no: [3a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İki yetimin hakkı olan alacağın tahsili Mahmiye-i İstanbul’da Hoca Hayreddin mahallesinde sâkin iken bundan akdem fevt olan Hüseyin nâm kimesnenin sulbî oğlu Mustafa nâm ve sulbiye kızı Ümmügülsüm nâm sagīrelerin tesviye-i umûrlarına kıbel-i şer‘den mansûb vasîleri olan işbu râfi‘ü’l-kitâb Hüseyin Çelebi b. Musli meclis-i şer‘-i şerîfde Süleyman b. Mehmed mahzarında üzerine bi’l-vesâye da‘vâ ve takrîr-i kelâm edip mezbûr Süleyman zimmetinde vasîleri olduğum sagīrân-ı mezbûrân mallarından iki bin akçe üzerine devr-i şer‘î ile ilzâm olunan dört yüz akçe ki cem‘an iki bin dört yüz akçeyi taleb eylediğimde teslîmden imtinâ‘ eder. Suâl olunup alıverilmesi murâdımdır dedikde gıbbe’s-suâl mezbûr Süleyman cevâbında fi’l-vâki‘ sagīrân-ı mezbûrâna ancak iki bin akçe deynim vardır deyû ikrâr üzerine devr-i şer‘î ile ilzâm olunan dört yüz akçeyi inkâr edicek vasiyy-i mezbûr Hüseyin Çelebi’den ziyâde dört yüz akçeyi mübeyyine beyyine taleb olundukda ityân-ı beyyine için istimhâl etmekle kıbel-i şer‘den mehil verildikden sonra mezbûr Süleyman’a ikrâr mertebesi olan meblağ-ı mezbûr iki bin akçeyi vasiyy-i mezbûr Hüseyin Çelebi’ye edâya ilzâm olunup kayd olundu. Fî 13 min Şa‘bân sene 1081. Şuhûdü’l-hâl: Hüseyin Çelebi b. Ali, Mehmed b. Mahmud, Mehmed b. İlyas, Ali b. Abdullah.