Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 43 Hüküm no: 10 Orijinal metin no: [3a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Seyfullah Efendi Vakfı’na ait bostanların gelirleri İşbu bâ‘isiyyü’l-kitâb Halil Beşe b. Abdullah ve Mustafa Bey b. Ali nâm kimesneler meclis-i şer‘de Bostancı tâifesinden Receb Beşe b. Abdullah mahzarında her biri üzerine da‘vâ edip mahmiye-i İstanbul hısn-ı ebvâbından Eğrikapı dâhilinde vâki‘ merhûm defterdâr-ı esbâk Seyfullah Efendi Vakfı’ndan olup icâre-i mu‘accele ve müeccele ile mutasarrıf olduğumuz bostan icâresinden mezbûr Receb Beşe zimmetinde bin seksen senesine gelince ba‘de küll-i hesâb dokuz bin akçe ve bin seksen senesi icâresinden yedi bin iki yüz akçe ki cem‘an on altı bin iki yüz akçenin iki bin sekiz yüz akçesini yedinden ahz u kabz edip bâkī zimmetinde on üç bin dört yüz akçe deyni olduğunu bize şuhûd mahzarında ikrâr ve işhâd eylemişdir. Suâl olunup alıverilmesi matlûbumdur dediklerinde gıbbe’s-suâl mezbûr Receb Beşe cevâbında bin seksen senesi icâresinden yedi bin iki yüz akçe deynini ikrâr, lâkin hesâb-ı mezbûr dokuz bin akçeyi inkâr edicek müdde‘iyân-ı mezbûrândan müdde‘âlarını mübeyyine beyyine taleb olundukda udûl-i müslimînden Ömer Beşe b. Eyüb ve Hasan Beşe b. Abdullah nâm kimesneler li ecli’ş-şehâde makām-ı kazâya hâzırân olup istişhâd olunduklarında fi’l-vâki‘ müdde‘iyân-ı mezbûrân ile merkūm Receb Beşe bizim huzûrumuzda ba‘de küll-i hesâb dokuz bin akçe bostan icâresinden zimmetimde lâzımü’l-edâ deynimdir deyû ikrâr ve bizi işhâd eyledi. Biz bu husûsa şâhidleriz, şehâdet dahi ederiz deyû her biri edâ-yı şehâdet-i şer‘iyye eylediklerinde gıbbe’r-ri‘âyeti şerâiti’l-kabûl şehâdetleri makbûle olmağın mûcibiyle meblağ-ı mezbûr altı bin iki yüz akçe ile ikrâr olunan yedi bin iki yüz akçe ki cem‘an [on] üç bin dört yüz akçeyi müdde‘iyân-ı mezbûrân Halil Beşe ve Mustafa Bey’e edâ ve teslîme mezbûr Receb Beşe’ye tenbîh [olundu]. Fî 13 min Şa‘bân sene 1081. Şuhûdü’l-hâl: Mehmed Beşe, Hüseyin Çelebi, Mehmed Eyüb, Mehmed Mahmud, Ali Abdullah.