Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 44 Hüküm no: 11 Orijinal metin no: [3b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Bey b. Kasım’ın Ali Ağa b. Hüseyin’e mülk satışı Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-de Nişâncı Paşa mahallesinde sâkin Ali Bey b. Kasım tarafından husûs-ı âti’l-beyâna ikrâra yedinde olan hüccet-i şer‘iyye ile vekîl olan Mehmed Çelebi b. Musli meclis-i şer‘de işbu sâhibü’l-kitâb Ali Ağa b. Hüseyin mahzarında bi’l-vekâle ikrâr ve i‘tirâf edip müvekkilim mezbûrun akd-i âti’z-zikrin sudûruna değin silk-i mülk-i sahîhinde münselik emlâkinden mahalle-i mezbûrede vâki‘ iki tarafı Topal Yusuf mutasarrıf olduğu vakıf menzil ve bir tarafı mekābir-i müslimîn ve bir tarafı tarîk-i âm ile mahdûd bir bâb fevkānî oda ve tahta-pûş ve üç bâb tahtânî oda ve sofa ve bir mikdâr arsa ve eşcâr-ı müsmire ve gayr-ı müsmire bahçeyi müştemil olup senede merhûm Abdurrahman Paşa Vakfı’na altmış akçe mukāta‘alı mülk menzilini cemî‘ tevâbi‘i ile mezbûr Ali Ağa’ya on dokuz bin fıddî râyicü’l-vakt akçeye bey‘-i bâtt-ı sahîh-i şer‘î ile bey‘ ve teslîm ol dahi vech-i muharrer üzre iştirâ ve tesellüm ve kabz ve kabûl eyledikden sonra meblağ-ı mezbûr [on] dokuz bin akçeyi yedinden tamâmen ahz u kabz eyleyip min ba‘d menzil-i mahdûd-ı mezkûrda alâka ve medhalim yoktur. Mezbûrun mülk-i müşterâsı olmuşdur dedikde gıbbe’t-tasdîk. Fî 13 min Şa‘bân sene 1081. Şuhûdü’l-hâl: Mustafa Çelebi Şaban, Ali Bey Mehmed, Mehmed Efendi Nasuh, Ramazan, Yusuf Abdullah, Mustafa, Mehmed Bey el-Cündî, Ahmed Çelebi el-Attâr.