Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 45 Hüküm no: 12 Orijinal metin no: [3b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Gül mahallesinde vefat eden Silistreli Süleyman’ın miras davasının sulh yoluyla halli Vilâyet-i Rumeli’nde Silistre Sancağı’nda Alo nâm karyede sâkin Ahmed nâm kimesne meclis-i şer‘de mahmiye-i İstanbul’da Gül Câmi‘i sûkunda bakkal tâifesinden râfi‘ü’r-rakīm İstirati v. Mavridi nâm zimmî muvâcehesinde ikrâr ve takrîr-i kelâm edip bundan akdem li ebeveyn karındaşım Dora’nın sulbî oğlu olup mezbûr İstirati dükkânında vefât eden Süleyman nâm kimesnenin cemî‘ metrûkâtı bana âid ve râci‘ olmağla mûrisim müteveffâ-yı mezbûrun bakkallık san‘atında mezbûr İstirati ile şerîkler olmağla müteveffâ-yı mezbûrun sermâyesinden altı bin yüz elli akçe sermâyesi olup meblağ-ı mezbûrun mûrisim müteveffâ-yı mezbûr hâl-i hayâtında bin yüz akçesini harc eyleyip ba‘de vefâtihî iki bin akçe dahi techîz ve tekfînine harc ve sarf olunmağla meblağ-ı mezbûrdan bâkī kalan üç bin yirmi akçeyi mezbûr İstirati yedinden bi’t-tamâm ve’l-kemâl ahz u kabz eyledim. Min ba‘d mûrisim müteveffâ-yı mezbûr Süleyman sermâyesi olan altı bin yüz kırk akçeden ve sâir muhallefâtından mezbûr İstirati yedinde bir akçe ve bir habbe bâkī kalmadı dedikde gıbbe’t-tasdîk kayd şud. Fî 15 min Şa‘bân sene 1081. Şuhûdü’l-hâl: El-Hâc Müstecab, Mahmud b. Hüseyin, Osman b. Mustafa, Abdülkādir, diğer Mahmud Hüseyin, Mehmed Bey.