Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 45 Hüküm no: 13 Orijinal metin no: [4a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Talebe göre harcanmayan paranın iadesinin talep olunduğu Hâlâ mahmiye-i İstanbul’da sadr-ı kāimmakām-ı âlî hazretleri mehterbaşısı olan işbu sâhibü’l-kitâb İbrahim Ağa b. Ahmed meclis-i şer‘de Kerime bt. Hızır mahzarında üzerine da‘vâ edip mezbûre Kerime Hâtun’a târih-i kitâbdan altı sene mukaddem bana bir menzil veyâhud bir câriye iştirâ ediver deyû yedinde iki yüz kırk beş guruşu dahi def‘ ve teslîm, ol dahi vech-i muharrer üzre ahz u kabz edip hâlâ meblağ-ı mezbûru merkūme Kerime kendi mesârifine sarfla istihlâk eylemişdir. Suâl olunup alıverilmesi murâdımdır dedikde gıbbe’s-suâl mezbûre cevâbında fi’l-vâki‘ müdde‘î-i merkūm İbrahim Ağa târih-i mezbûrda bana menzil veyâhud bir câriye iştirâ ediver deyû yedime iki yüz kırk beş esedî guruş def‘ ve teslîm ben dahi ahz u kabz eyledim. Lâkin sâlifü’z-zikr meblağı ben kendi mesârifime sarfla istihlâk eyleyip ammâ elân zimmetimde lâzımü’l-edâ ve vâcibü’l-kazâ deynimdir deyû ikrâr ve i‘tirâf etmeğin alâ mûceb-i i‘tirâf meblağ-ı merkūma müdde‘î-i merkūme edâya tenbîh birle kayd şud. Fî 16 min Şa‘bân sene 1081. Şuhûdü’l-hâl: Mustafa Halîfe b. Musa el-Müezzin, Mehmed Bey b. Hasan el-(…), Mahmud Çelebi b. Hüseyin, İbrahim Bey b. Hasan.