Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 46 Hüküm no: 14 Orijinal metin no: [4a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hatice bt. Abdullah’ın boşanma davasını takip için vekil tayini Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-de Şah Sultan mahallesinde sâkine Hatice bt. Abdullah nâm hâtun meclis-i şer‘-i şerîfde işbu râfi‘ü’l-kitâb İsmail Bey b. Abdullah nâm kimesne mahzarında ikrâr ve takrîr-i kelâm edip zevcim Mehmed b. Abdullah nâm kimesne Vilâyet-i Rumeli’de Malkara kazâsına tâbi‘ Müstecab nâm karyede te[e]hhül eylediği mesmû‘um olmakla zimmetinde mütekarrir ve ma‘kūdun-aleyh olan bin beş yüz akçe mehr-i müeccelimden nafaka ve iddet ve me’ûnet-i süknâmdan fâriğa olmak üzre zevcim mezbûr Mehmed ile hul‘ ve ibrâya tarafımdan mezbûr İsmail Bey’i vekîl ve nâib-i menâb nasb ve ta‘yîn eyledim dedikde ol dahi vekâlet-i merkūmeyi kabûl ve hizmet-i lâzımesini edâya ta‘ahhüd etmeğin kayd şud. Fî 17 min Şa‘bân sene 1081.