Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 46 Hüküm no: 15 Orijinal metin no: [4a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Perviz’in muhâlaa yoluyla boşanması Eyyûb mahallâtından Kiremitçi Süleyman Çelebi mahallesi sâkinelerinden Fâtıma bt. Perviz nâm hâtun tarafından husûs-ı âti’l-beyânı ikrâra vekîl olup vekâleti zâtını ma‘rifet-i şer‘iyye ile ârifân olan Mustafa Bey b. İsmail ve Yusuf Halîfe b. Abdullah nâm kimesneler şehâdetleri ile şer‘an vekâleti sâbite olan Ahmed Çelebi b. Emrullah meclis-i şer‘-i şerîfde müvekkilesi mezbûr[e] Fâtıma’nın zevci işbu râfi‘ü’l-kitâb Mehmed Bey b. Ali mahzarında bi’l-vekâle ikrâr ve takrîr-i kelâm edip müvekkilem mezbûr[e] Fâtıma’nın zevci mezbûr ile beyinlerinde hüsn-i zindegânîleri olma[ma]ğla zimmetinde mütekarrir ve ma‘kūdun-aleyh olan beş bin iki yüz akçe mehr-i müeccelinden ve nafaka-i iddet-i mu‘ayyene ve me’ûnet-i süknâsından fâriğa olduğundan mâ‘adâ müvekkilem mezbûrenin hamli zâhir olursa tevellüd eden sagīri dahi bilâ taleb-i nafaka velâ kisve yedi seneye değin infâk ve iksâ etmek üzre muhâla‘a-i sahîha-i şer‘iyye ile muhâla‘a edip hukūk-ı zevciyyete müte‘allik âmme-i de‘âvî ve mütâlebât ve eymân ve muhâsamâttan zimmetini ibrâ ve iskāt eyledim dedi deyicek mezbûr Mehmed Bey meclis-i şer‘de ben dahi müvekkile-i mezbûre ile minvâl-i muharrer üzre olan hul‘ı kabûl eyledim deyû vekîl-i mezbûru cemî‘ kelimât-ı muharreresinde vicâhen tasdîk ve tahkīk etmeğin kayd şud. Fî 17 min Şa‘bân sene 1081. Şuhûdü’l-hâl: Mehmed Efendi b. Yusuf el-İmâm, Mustafa Çelebi b. Mumcu, Ahmed Çelebi b. Mehmed, Hasan b. Hasan, Mehmed Eyüb, Ali b. Abdullah diğer Mehmed b. Mahmud.