Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 47 Hüküm no: 16 Orijinal metin no: [4b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Veresesi olmayan Kara Çavuş’un bazı mülklerinin hazineye intikali Husûs-ı âti’l-beyânı mahallinde ketb ve tahrîri için savb-ı şer‘-i kavîmden umdetü’l-müderrisîn Mevlânâ Mustafa Efendi [b.] İsmail irsâl olunup ol dahi zeyl-i kitâbda muharrerü’l-esâmî müslimîn ile Havâss-ı aliyye kazâsına tâbi‘ Topçular nâm karyede zikr-i âti menzile varıp akd-i meclis-i şer‘-i şerîf olundukda mahmiye-i İstanbul’da hâlâ bi’l-fi‘l dergâh-ı âli -dâme mahfûfen bi’l-me’âlî- yeniçerileri beytülmâl emîni olan -kıdvetü’l-emâcid ve’l-ekâri[m]- Ali Ağa b. İsmail meclis-i ma‘kūd-ı mezkûrda işbu sıhhat-nisâbın ve sedâd-esbâbın sâhibi umdetü’l-kuzâti’l-eşbâh, zübdetü’l-vülâti’l-enâm fahrü’s-sâdâti’l-kirâm es-Seyyid Ali Efendi b. es-Seyyid Emin mahzarında ikrâr ve i‘tirâf edip bundan akdem intikāl-i dâr-ı bekā eden Kara Çavuş demekle müştehir ağanın verâseti zevce-i metrûkesi Şâkire bt. Abdullah ile sulbî oğlu Mustafa Ağa’ya münhasıra olup kable’l-kısme mezbûr Mustafa Ağa dahi vefât edip verâseti vâlidesi mezbûre Şâkire Hâtun’a intikāl edip ba‘dehû mezbûre Şâkire dahi vefât edip verâseti zevci Hasan Çavuş b. Osman Bey’e intikāl eylediği şer‘an zâhir ve mütebeyyin oldukdan sonra mezbûre Şâkire Hâtun hâl-i hayâtında ve akl-ı sıhhatinde bin yetmiş altı senesi Şevvâlü’l-mükerreminin on beşinci günü zevc-i mezbûr Kara Çavuş Mustafa Ağa muhallefâtından olup karye-i mezbûrede vâki‘ bir tarafı Topçular Vakfı ve bir tarafı mîrî tarla ve bir tarafı Sultan Bayezid Vakfı ve bir tarafı tarîk-i âm ile mahdûd dâhiliyesi üç bâb fevkānî oda ve üç bâb tahtânî oda ve üç anbar ve kapı üzerinde iki bâb fevkānî oda ve bir matbah ve kör bi’r-i mâ ve kör kireçlik ve hâriciye üç bâb fevkānî oda ve bir orta sofası ve dehlîz ve altında ahır ve havlu ve muttasıl zât-ı eşcâr-ı müsmire ve gayr-ı müsmire bahçe ve bi’r-i mâ ve sundurma ve samanlık ve munfasıl on ocaklı hâne ve bir nalbant dükkânı ve dolap kuyusunu müştemil mülk-i mevrûs menzilini bi cümleti’t-tevâbi‘ ve’l-levâhık yüz bin fıddî râyic fi’l-vakt akçe[ye] zevci mezbûr Hasan Çavuş’a bâtten bey‘ ve teslîm, ol dahi iştirâ ve tesellüm ve kabûl ve kabzına ve semeni olan meblağ-ı mezbûr yüz bin akçeyi ahz u kabz eylediğini ol târihde mahmiye-i İstanbul’da hilâfete müvellâ olan Ahmed Efendi b. Feyzullah huzûrunda sicil ve hüccet olundukdan sonra mezbûr Hasan Çavuş dahi vefât edip zâhirde vâris-i ma‘rûf ve ma‘rûfesi olmamağla cemî‘ muhallefâtı beytülmâle âid ve râci‘ olmağın menzil-i mahdûd-ı mezkûr beytülmâl tarafından bey‘ olunmak lâzım gelmeğin sûk-ı sultânîde kirâren, mirâren nidâ ve müzâyede olunup ragabât-ı nâs bi’l-külliye munkati‘ oldukdan sonra mûmâ-ileyh es-Seyyid Ali Efendi üzerinde yüz yirmi bin akçede karâr edip ziyâde ile tâlib-i âhar zuhûr etmemeğin menzil-i mahdûd-ı mezkûru cemî‘ tevâbi‘ ve levâhıkı ile semeni olan meblağ-ı mezbûr yüz yirmi [bin] akçeye mûmâ-ileyh es-Seyyid Ali Efendi emânetim hasebiyle bey‘-i bâtt-ı sahîh-i şer‘î ile bey‘ ve teslîm ol dahi vech-i muharrer üzre iştirâ ve kabûl eyledikden sonra meblağ-ı mezbûr yüz yirmi bin akçeyi yedinden bi’t-tamâm ve’l-kemâl ahz u kabz eyledim menzil-i mezkûr merkūm es-Seyyid Ali Efendi’nin mülk-i müşterâsı olmuşdur. Mevlânâ-yı mezbûr mahalline tahrîre tenbîh …? kendince tasarruf ede. Fî 17 min Şa‘bân sene 81. Şuhûdü’l-hâl: Es-Seyyid Mehmed Efendi, Umdetü’l-emâcid ve’l-ekârim Hasan Ağa b. Receb, Mehmed Beşe b. Abdurrahman, es-Seyyid Allame Hüseyin b. Abdullah, Mehmed b. Hüseyin, Mehmed b. Mahmud, Ali b. (…), Hasan b. Ali, Dilaver el-muhzır, Ali b. Abdullah.