Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 48 Hüküm no: 17 Orijinal metin no: [5a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Elker bt. Yorgi’nin Salih Beşe b. Mehmed’e tarla satışı Havâss-ı Aliyye kazâsına tâbi‘ Büyükhalkalı nâm karye sâkinelerinden Aliki bt. Yorgi nâm nasrâniye meclis-i şer‘de işbu râfi‘ü’l-kitâb Salih Beşe b. Mehmed mahzarında ikrâr edip akd-i âti’z-zikrin sudûruna değin silk-i mülk-i sahîhimde münselik emlâkimden karye-i mezbûrede vâki‘ bir tarafı Mehmed Ağa mülkü ve bir tarafı Kabasakal mülkü ve bir tarafı Kalayid mülkü ve bir tarafı Panayid mülkü ve bir tarafı [tarîk-i] âm ile mahdûd iki bâb tahtânî oda ve bahçe ve havluyu müştemil mülk menzilimi cemî‘ tevâbi‘i ile mezbûr Salih Beşe’ye iki bin sekiz yüz fıddî akçeye bey‘-i bâtt-ı kat‘î ile bey‘ ve teslîm edip vech-i muharrer üzre iştirâ ve kabûl eyleyip ve yine tefvîz-i âtî sudûruna değin karye-i mezbûrede vâki‘ her birinin hudûdu beynimizde ma‘lûm üç kıt‘a tarlalarımın hakk-ı tasarruflarını dahi bi izni’l-mütevellî iki yüz akçe bedel mukābelesinde tefvîz bi’l-ferâğ edip ol dahi tefevvuz ve kabûl eyledikden sonra semen-i mezbûr ile bedel-i merkūm cem‘an üç bin akçeyi yedinden bi’t-tamâm ahz u kabz eyledim. Min ba‘d menzil-i mezkûrda alâka ve medhalim yoktur. Mezbûr Salih Beşe’nin mülk-i müşterâsı ve dahi merkūme[nin] dâhil-i taht-ı tasarrufu olmuşdur dedikde gıbbe’t-tasdîk. Fî 19 Şaban sene 81. Şuhûdü’l-hâl: Sefer Beşe b. Abdullah, Süleyman b. Musli, Mustafa Kethüdâ, İbrahim Ağa, Musli b. Çelebi, Mehmed b. Eyüb.