Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 48 Hüküm no: 18 Orijinal metin no: [5a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ehl-i Hıref’e tevzi olunan tekliflerin yine eski usule göre tevzi Havâss-ı Aliyye kazâsı tevâbi‘inden kasaba-i Hasköy’de sâkin Mustafa Çelebi b. Dilaver ve el-Hâc Hasan ed-debbâğ ve Mehmed b. Siyavuş ve Ahmed b. Abdullah ve Hüseyin el-Hallâk ve Mehmed b. İbrahim el-Hallâk ve Hüseyin el-Bostânî ve Aydın b. Abdullah ve Kaytas b. Abdullah ve sâirleri meclis-i şer‘-i hatîrde yine kasaba-i mezbûrede sâkin Yahudi tâifesinden Avraham v. Yisak ve Musa v. Abram ve Abraham v. Sebatay ve Baruh v. Binyamen ve Salamon v. İsrail ve Elez v. İsrail ve yine kasaba-i mezbûre keferelerinden Manol v. Angeli ve Yamandi v. Yani ve Mihal v. Yani ve Küçük Keremeti v. Yamandi ve sâirleri muvâcehelerinde her biri üzerlerine takrîr-i da‘vâ edip işbu sene-i mübârekede taraf-ı Saltanat-ı aliyyeden emr-i şerîf-i cihân-mutâ‘ ile iştirâsı fermân olunan arpayı kasaba-i mezbûre mahallâtı ahâlîsine tevzî‘ murâd eylediğimizde mezbûrûn Yahudiler ve kefere tevzî‘de mâni‘ olurlar. Suâl olunup takrîrleri tahrîr olunmak matlûbumuzdur dediklerinde gıbbe’s-suâl mesfûrûn Yahudiler ve kefere cevâblarında biz cümle ehl-i hırfet ve hem mahallât sâkinlerindeniz. Kadîmü’l-eyyâmdan bu âna gelince vâki‘ ola[n] teklîfât ehl-i hırefe tevzî‘ oluna gelmişdir. Yine ol minvâl üzre olunmak taleb ederiz. Hattâ yedimizde husûs-ı mezbûr için fermân-ı şerîf dahi vardır deyû yedlerinde olan fermân-ı şerîfi ibrâz eylediklerinde fi’l-hakīka bin seksen bir senesine gelince minvâl üzre olageldiyse yine ol minvâl üzre ola deyû buyurulmağın mezbûrûn müslümanlardan suâl olundukda fi’l-hakīka bu âna gelince ehl-i hıref üzerine tevzî‘ olunagelmişdir deyû her biri tav‘an ikrâr ve i‘tirâf etmeğin min ba‘d dahi kadîmden olageldiği üzre ehl-i hırefe tevzî‘ olunmak üzre kıbel-i şer‘den cümleye tenbîh birle mâ cerâ kayd şud. Fî 19 min Şaban sene 81. Şuhûdü’l-hâl: Ömer Ağa Hammâmî, Abdurrahman Ağa tâbi‘-i Hazret-i sâhib-i devlet, Mustafa Çavuş el-Mübâşir, Mustafa Efendi Nâib-i Hasköy, Mehmed Ağa el-Müezzin, Çelebi Hüseyin b. Mustafa, Mehmed b. Eyüb.