Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 49 Hüküm no: 19 Orijinal metin no: [5a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefa Hatun bt. Abdullah’ın câriyesini vasiyet yoluyla âzat etmesi ve sair vasiyeti Medîne-i Hazret-i Ebâ Eyyûb el-Ensârî -radiye anhu Rabbühü’l-Bârî- mahallâtından Koca Kasım Paşa mahallesi sâkinelerinden Vefâ Hâtun bt. Abdullah vaktâ ki işbu dünyâ-yı denî misâl-i zıll-ı hayâl olup herkesin işlediği a‘mâl eğer hayr ve eğer şerdir misâl-i hâbda idiğine âlime ve dâr-ı âhirette herkes zıll-ı sadakâtında müstazıll idiğine câzime olduysa bazı sadakât-ı mebrûre inşâsına niyet ve muzâfen ilâ mâ ba‘de’l-mevt şöyle vasiyyet eyledi ki küllü nefsin zâ’ikatü’l-mevt ve küllü hayyin mülâkihi’l-fevt fehvâsınca ben işbu dâr-ı gurûrdan saray-ı bîrûna intikāl ve irtihâl eylediğimde işbu orta boylu, açık kaşlı, gök gözlü Rûsiyyetü’l-asl Yasemin bt. Abdullah nâm câriye-i memlûkem tedbîr-i mutlak ile müdebbere olunup cemî‘ malımdan âzâd ola ve ondan mâ‘adâ silk-i mülkümde münselik emlâkimden bir altın bilezik ve beş sahan ve beş tencere ve bir börek tepsisi vasiyy-i muhtârım yediyle sûk-ı sultânîde semen-i misilleri ile bey‘ olunup hâsıl olan meblağ techîz ve tekfînime ve iskāt-ı salâtım ve eyyâm-ı mu‘tâdda tabh-ı ta‘am-ı fukarâ-yı enâm olunup ondan mâ‘adâ iki kaftan ve bir anteri ve iki döşek ve bir hamam tası ve bir kefgir ve bir tencere ve bir kebîr tâbe ve dört yemenî yorgan ve bir köhne kaliçe ve iki kilim ve altı yastık ve sâir hırdavât zevcim Murad Beşe alâ mâ farazallâhü hissesini aldıkdan sonra mâ‘adâsı mezbûr[e] Yasemin’e verile ve vesâyet-i mezkûreyi tenfîze işbu hâzır bi’l-meclis Hasan Bey b. Ali’yi vasiyy-i muhtâr nasb ve ihtiyâr eyledim dedikde ol dahi vesâyet-i mezkûreyi kabûl ve hıdemât-ı lâzımesini edâya ta‘ahhüd ve iltizâm eylemeğin mâ hüve’l-vâki‘ bi’t-taleb ketb olundu. Fi’l-yevmi’s-sâmin-i aşer min şehr-i Şa‘bâni’l-mu‘azzam li seneti ihdâ ve semânîn ve elf. Şuhûdü’l-hâl: Mustafa Çelebi b. Mehmed, Mehmed Çelebi b. Halil, Mustafa b. Ali, Hasan Çelebi b. Ali.