Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 50 Hüküm no: 21 Orijinal metin no: [5b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Osman b. Mehmed adlı kıptinin çalınan nakit ve eşyasının mahkeme huzurunda iadesi Hâric-i medîne-i Hazret-i Ebâ Eyyûb el-Ensârî -dâme fî rıdvâni’l-Bârî-de Topçular nâm mahalde vâki‘ handa mütemekkin râfi‘ü’l-vesîka Osman b. Mehmed nâm kıbtî mahfil-i kazâda oğlu Abdülbâkī nâm kıbtînin zevcesi Fâtıma bt. Süleyman nâm kıbtiye muvâcehesinde üzerine takrîr-i da‘vâ edip târih-i kitâbdan bir gün mukaddem mezbûre Fâtıma sâkin olduğumuz hânda heybesi içinde mahfûz deri kese ile yirmi altı kıt‘a esedî ve altı aded Kıbrısî guruşu ve adedi ma‘lûm sîm raht kuşağı hafiyyeten alıp firâr ederken âgâh olduğumda Otakçılar nâm mevzi‘de yetişip elinden almak murâd eylediğimde mabeynimizde muslihûn tavassut edip zikr olunan deri keseyi mezbûre Fâtıma yedinden alıp işbu hâzır bi’l-meclis Mustafa Çelebi nâm attâra emânet vaz‘ etmişlerdir. Hâlâ suâl olunup zikr olunan malımın alıverilmesi matlûbumdur deyicek merkūm Mustafa Çelebi mârrü’z-zikr keseyi meclis-i şer‘a getirip feth ve addolundukda ayniyle yirmi altı esedî, altı duka guruş ve bir sîm raht kuşak bulunup mezbûre Fâtıma’dan suâl olundukda zikr olunan guruşlar ve kuşak mezbûrundur târih-i mezbûrda mahall-i mezkûrdan alıp firâr ederken yetişip elimden aldılar deyû bi tav‘ihâ ikrâr etmeğin mâ vaka‘a kayd şud. Fî 19 Şa‘bân sene [10]81. Şuhûdü’l-hâl: Hüseyin Çelebi b. Ahmed, Mehmed Beşe b. İbrahim, Abdi Çelebi b. ( ), Mehmed Beşe b. ( ), Mustafa [b.] Ahmed, Mustafa [b.] Yusuf.