Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 51 Hüküm no: 22 Orijinal metin no: [5b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yamandi’nin ölümü sebebiyle vârislere intikal eden alacakların tahsili Havâss-ı Aliyye kazâsı tevâbi‘inden Litros nâm karye zimmîlerinden iken bundan esbâk mürd olan Yamandi v. Todori nâm zimmînin verâseti zevce-i metrûkesi Fırşini bt. Vasiliki ile sulbî kebîr oğulları Rali ve Kostantin’e ve sulbiye-i kebîre kızı Aksadi nâm nasrâniyeye ve sulbiye-i sagīre kızları Ezmerağda ve Maryora’ya münhasıra olduğu şer‘an zâhir ve müte‘ayyin oldukdan sonra mezbûr Fırşini kendi tarafından asâleten, sadriye kızları sagīretân-ı mezbûretânın tesviye-i umûrları için kıbel-i şer‘den mansûb vasîleri olmağın vesâyete mesfûran Rali ve Kostantin dahi asâleten ve mersûme Aksadi tarafından husûs-ı âti’z-zikre vekîl olup vekâleti zâtını ma‘rifet-i şer‘iyye ile ârifân olan karındaşı Rali ve Dimitri v. Yorgi şehâdetleri ile şer‘an sâbite olan zevci Zafiri v. Nikola nâm zimmî vekâleten meclis-i şer‘-i hatîr-i lâzımü’t-tevkīrde hasbahçe bostânîlerinden işbu kitâb-ı sıhhat-nisâb ve sedâd-intisâbın sâhibi fahrü’l-emâsil ve’l-a‘yân Süleyman Bey b. Mehmed mahzarında her biri bi’l-asâle ve bi’l-vesâye ve bi’l-vekâle ikrâr-ı tâm ve takrîr-i kelâm edip mûrisimiz hâlik-i mezbûr Yamandi hâl-i hayâtında merkūm Süleyman Bey’den beş yüz kıt‘a esedî guruş istikrâz ve kabz edip kable’l-edâ mürd olmağla mezbûr Süleyman Bey zikr olunan beş yüz esedî guruşu bizden taleb ve da‘vâ ve muvâcehemizde kıbel-i şer‘î üzre isbât ve edâsına hükm-i hâkim lâhık oldukdan sonra mezbûr Süleyman Bey zikr olunan beş yüz esedî mukābelesinde bizden kırk beşer guruşa bir re’s bârgir ve seksen guruşa Rûsiyyetü’l-asl bir câriye ve doksan guruşa Rûsiyyü’l-asl bir gulâm ve değeri yedi bin akçeye karye-i mezbûrede vâki‘ bir tarafı Kominos zimmî ve bir tarafı Kasab Nikola mülkü ve iki tarafı tarîk-i âm ile mahdûd bir bâb ahır ki nısfını ve mukābelesinde olan bir bâb bakkal dükkânımın dahi nısfını alıp kabz etmişdi el-hâletü hâzihî ahz eylediği Bârgir ve câriye ve gulâm ve nısf ahır ve nısf bakkal dükkânını biz mezbûr Süleyman Bey’den da‘vâ ve taleb eylediğimizde ol dahi mülk-i müşterâmdır deyû teslîmden imtinâ‘ etmekle beynimizde münâza‘ât-ı kesîre ve muhâsamât-ı adîde vâkı‘a olmuşken beynimize muslihûn tavassut edip biz mezbûr Süleyman Bey yedine yedi bin beş yüz akçe def‘ ve teslîm ol dahi kabz eylediği nısf ahır ve nısf bakkal dükkânını bize def‘ ve teslîm etmek üzre bizi sulh eylediklerinde husûs-ı mezbûr sulh-ı sagīretân-ı mezbûretâna evlâ ve enfa‘ olmağla biz dahi sulh-ı mezbûru kabûl ve meblağ-ı mezbûr yedi bin beş yüz akçeyi mezbûr Süleyman Bey yedine bi’t-tamâm def‘ ve teslîm eylediğimizde ol dahi alıp kabz edip mârrü’z-zikr nısf ahır ve nısf bakkal dükkânını bize def‘ ve teslîm, biz dahi alıp ke’l-evvel zabt ve tasarruf edip husûs-ı mezbûra müte‘allik âmme-i de‘âvî ve mütâlebâtdan mezbûr Süleyman Bey bizi, biz dahi merkūm Süleyman Bey’in zimmetini ibrâ ve iskāt eyledik ba‘de’l-yevm zikr olunan beş yüz esedî ve ol bârgir ve gulâm ve câriye ve sâlifü’z-zikr nısf ahır ve nısf bakkal dükkânına müte‘allik birbirimiz ile vechen mine’l-vücûh da‘vâ ve nizâ‘ımız yoktur zuhûr dahi ederse lede’l-hükkâmi’l-kirâm mesmû‘a ve makbûle olmasın deyû her biri bi’l-asâle ve bi’l-vesâye ve bi’l-vekâle ikrâr ve i‘tirâf edicek gıbbe’t-tasdîki’l-mu‘teber mâ vaka‘a ketb olundu. Fî 21 Şa‘bân sene [10]81. Şuhûdü’l-hâl: Mustafa Bey b. Veli Seyyid Mehmed Çelebi b. Seyyid Hasan, Mehmed Beşe b. Mustafa, Yusuf Hoca [b.] Nidâ, Salih Beşe Efendi b. İsmail Kâtib, Mustafa Efendi, Hüseyin Çelebi b. Ali, Mehmed b. Eyüb, Mehmed b. Mahmud.