Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 53 Hüküm no: 24 Orijinal metin no: [6a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Siyavuş’un açtığı darp davasının sulh ile bitirilmesi Medîne-i Hazret-i Ebâ Eyyûb el-Ensârî’de Baba Haydar mahallesinde sâkin Mehmed b. Siyavuş meclis-i şer‘de Salih Çelebi b. Mehmed nâm kimesne ile Memiş b. Mustafa tarafından tasdîka vekîl olup vekâleti nehc-i şer‘î üzre sâbit olan Ali b. el-Hâc Bayram mahzarında ikrâr ve i‘tirâf edip Salih Çelebi ile müvekkil-i mezbûr Memiş târih-i kitâbdan iki gece mukaddem beni ( ) nâm mahalde bi gayr-ı vech-i şer‘î darb ve istimdâd, lâbise olduğum kapamayı pâre pâre etmeleriyle da‘vâ ve mûceb-i şer‘îsi icrâ murâd eylediğimde her biri inkâr ile cevâb verdiklerinde beynimize muslihûn tavassut edip da‘vâ-yı merkūmeden beni mezbûr Salih Çelebi ile müvekkil-i merkūm Memiş ile kapamamı tazmîn etmek üzre inşâ-i akd-i sulh eylediklerinde ben dahi sulh-ı mezbûru kabûl ve zikr olunan kapamamı yedinden alıp kabz eyledim husûs-ı mezbûra müte‘allik de‘âvîden mezbûr Salih Çelebi ve müvekkil-i merkūm Memiş Çelebi’nin zimmetini ibrâ ve iskāt eyledim min ba‘d mezbûrân ile da‘vâ ve nizâ‘ım yoktur dedikde gıbbe’t-tasdîk kayd şud. Fî 21 min Şa‘bân sene ihdâ ve semânîn ve elf. Şuhûdü’l-hâl: Mehmed b. Mahmud, Hüseyin Çelebi b. Ali, Ali b. Abdullah, Dilaver el-muhzır.