Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 53 Hüküm no: 25 Orijinal metin no: [6a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şahsultan mahallesinde mülk satış hücceti Sâbıkan sadr-ı a‘zam olup bundan akdem vedâ‘-ı âlem-i fânî eden Eğriboyunlu Mehmed Paşa’nın vâlidesi Düriye bt. Durmuş Efendi’nin li ebeveyn kız karındaşı Râbia nâm hâtunun sulbî oğlu, merhûm-ı mezbûrun zî-rahm cihetinden hasran vârisi fahrü’l-akrân Mustafa Ağa b. Ahmed meclis-i şer‘-i şerîfde işbu kitâb-ı sıhhat-nisâb ve sedâd-intisâbın sâhibi umdetü’l-emâsil ve’l-a‘yân Osman Ağa b. Ömer mahzarında ikrâr ve i‘tirâf edip mûrisim paşa-yı mezbûrdan bi’l-irsi’ş-şer‘î bana isâbet eden emlâkden medîne-i Hazret-i Ebâ Eyyûb el-Ensârî Şahsultan mahallesinde vâki‘ bir tarafı yine Şahsultan Câmi‘-i Şerîfi haremi ve bir tarafı Haremeyn-i Şerîfeyn Vakfı ve bir tarafı Hüsrevzâde Vakfı ve bir tarafı tarîk-i âm ile mahdûd altı bâb tahtânî ve altı bâb fevkānî odaları ve iki sofayı ve ahırı ve havluyu ve mâ’-i cârîyi ve anbar ve iki kenîfi müştemil mülk-i mevrûs menzilimiz[i] bi cümleti’t-tevâbi‘ ve’l-levâhık mezbûr Osman Ağa’ya elli bin fıddî nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi minvâl-i muharrer üzre iştirâ ve tesellüm ve kabûl ve kabz edip semeni olan mezbûrü’n-na‘t elli bin akçeyi bi’t-tamâm ve’l-kemâl müşterî-i mûmâ-ileyh yedinden alıp, kabz edip menzil-i mahdûd-ı mezkûrda vechen mine’l-vücûh alâka ve medhalim yoktur müşterî-i mûmâ-ileyhin mülk-i müşterâsıdır dedikde kayd şud. Fî 22 min Şa‘bân sene 1081. Şuhûdü’l-hâl: Davud Paşazâde Süleyman Bey, el-Hâc Hasan Bey b. Abdullah, Ömer Bey b. Abdullah, Derviş b. Yusuf, el-Hâc Hızır, Halil Çelebi, Şahin Bey b. Abdullah, İsmail Efendi, Süleyman Çelebi.