Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 54 Hüküm no: 26 Orijinal metin no: [6b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüma Hatun Vakfı’ndan bir vakıf evin tasarruf hakkının Mehmed Halife’ye devri Medîne-i Hazret-i Ebâ Eyyûb el-Ensârî -radiye anhu Rabbühü’l-Bârî-de Koca Kasım Paşa mahallesi sâkinlerinden olup merhûme Hümâ Hâtun nâm sâhibetü’l-hayrın mahalle-i mezbûrede vakf-ı sahîh ve lâzım ile vakf ve habs edip süknâsı ba‘de inkırâz-ı evlâd sulehâya şart ve ta‘yîn ve vakfiye-i ma‘mûlü’n-bihâsında tahsîs ve tahrîr eylediği bir tarafı es-Seyyid Mehmed Efendi mülkü ve bir tarafı zevci İbrahim mülkü ve bir tarafı ba‘zan imâma meşrût ve vakf menzil ve ba‘zan Hüseyin Ağa mülkü ve taraf-ı râbi‘i tarîk-i âm ile mahdûd olan vakıf menzile şart-ı vâkıfa üzre tevcîh-i hâkimü’ş-şer‘le mutasarrıf olan es-Seyyid Mehmed Efendi b. es-Seyyid Mustafa tarafından husûs-ı âti’l-beyâna vekîl olup Osman Çelebi ve Ahmed Çelebi ibney Mehmed şehâdetleriyle şer‘an vekâleti sâbite olan Ahmed Çelebi b. Mehmed el-Yesârî meclis-i şer‘-i şerîfde müvekkil-i mezbûr es-Seyyid Mehmed Efendi’nin kayınatası işbu sâhibü’l-kitâb Mehmed Halîfe b. el-Hâc İlyas mahzarında bi’l-vekâle ikrâr ve takrîr-i kelâm edip müvekkilim mezbûr es-Seyyid Mehmed Efendi bâlâda mezkûr mutasarrıf olduğu vakıf menzili kendi rızâ ve hüsn-i ihtiyârıyla kayınatası mezbûr Mehmed Halîfe’ye fâriğ olup kıbel-i şer‘-i şerîfden tasarrufu için izin verilmek matlûbumdur dedikde hâkim-i muvakki‘-i sadr-ı kitâb tûbâ lehû ve hüsnü me’âb hazretleri menzil-i vakf-ı mezbûru mezbûr Mehmed Halîfe’ye tevcîh edip tasarrufu için hâzihi’l-vesîka bi’t-taleb ketb olundu. Fî 23 min Şa‘bân sene [1081]. Şuhûdü’l-hâl: Mehmed Efendi b. İbrahim İmâm-ı sânî-i Câmi‘-i Kebîr, Mehmed Efendi el-Müderris, Eyüb Efendi b. Mustafa, Mehmed b. Hasan, Mustafa Çelebi b. Mehmed ve gayruhüm.