Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 54 Hüküm no: 27 Orijinal metin no: [6b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rus asıllı câriyenin âzadı Medîne-i Hazret-i Eyyûb el-Ensârî’de Zal Mahmud Paşa mahallesi sâkinelerinden Meryem bt. Abdullah nâm hâtun tarafından husûs-ı âti[’l-beyânda] vekîl olup vekâleti zâtını ma‘rifet-i şer‘iyye ile ârifân olan mahalle-i mezbûre imâmı Mustafa Efendi b. Hasan ve müezzini …? b. Abdullah şehâdetleriyle şer‘an sâbite olan zevci -umde-i züvvârü’l-Haremeyni’ş-şerîfeyn es-sâ‘î beyne’s[-Safâ] ve’l-Merveteyn- el-Hâc Abdullah Halîfe b. İbrahim meclis-i şer‘-i hatîrde zevcesi müvekkile-i mezbûre Meryem Hâtun[’un ta‘rîfi ile] müte‘arrefe orta boylu, açık kaşlı, elâ gözlü, sarışın Rûsiyyetü’l-asl sâhibetü’l-kitâb Sâcide bt. Abdullah mahzarında bi’l-vekâle ikrâr ve i‘tirâf edip müvekkilem zevcem mezbûre Meryem Hâtun câriye-i memlûkesi mevsûfe-i mezkûreyi hasbeten lillâhi’l-azîm ve hasaneten li-rûh-i Rasûlihi’l-kerîm târih-i kitâbdan altı ay mukaddem malımdan ihrâc ve i‘tâk ve tahrîr edip zümre-i harâir-i asliyyâta idrâc edip târih-i mezbûrdan bu âna gelince sâir harâir-i asliyyât gibi hürre olup üzerinde hakk-ı velâdan gayri hakkım kalmadı dedi deyicek mâ vaka‘a kayd şud. Fî 23 min Şa‘bân sene [10]81. Şuhûdü’l-hâl: Umdetü’l-emâcid ve’l-e‘âlî İslâm Ağa, es-Seyyid Abdülbâkī Efendi b. İmâm-ı evvel-i Zal Paşa, Mehmed Çelebi b. Mehmed, Mustafa b. Mehmed, Muharrir-i sânî Eyüb Çelebi b. el-müsta‘id, Salih Mehmed Efendi b. Mehmed, Hüseyin Muhzır, Ali Muhzır.