Eyüb Mahkemesi (Havass-ı Refia) 82 Numaralı Sicil (H. 1081 / M. 1670 - 1671) cilt: 29, sayfa: 55 Hüküm no: 29 Orijinal metin no: [7a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Eyüp Sultan ahalisinden Seyyid Mehmed Efendi’nin vakıf senedi [Elhamdü] li-veliyyihî ve’s-salâtü ve’s-selâmü alâ Nebiyyihî Muhammedin ve âlihî ve sahbihî ecma‘în. Ammâ ba‘d, işbu kitâb-ı sıhhat-nisâbın tahrîr ve inşâsına bâ‘is ve bâdî oldur ki mehbitü’l-envâr, makarrü’l-ebrâr belde-i mübâreke-i Hâlidiyye, medîne-i Hazret-i Ebâ Eyyûb el-Ensârî -dâme fî rıdvâni’l-Bârî-de Koca Kasım Paşa mahallesinde sâkine işbu hayrât ve hasenâtın sâhibi ve sadakât-ı meberrâtın tâlibi ve râğıbı mefharü’s-sâdat…? es-Seyyid Mehmed Efendi b. es-Seyyid Mustafa kıbelinden vakf-ı âti’l-beyânı ikrâra ve tebyîn-i şurût ve kuyûd ve ba‘dehû rücû‘-ı şer‘-i hatîrde murâfa‘a ve muhâsamaya vekîl olup vekâleti Osman Çelebi ve Ahmed Çelebi ibney Mehmed şehâdetleri ile şer‘an sâbite [fahrü’l-]akran Ahmed Çelebi b. Mehmed el-Yesârî meclis-i şer‘-i şerîf-i lâzımü’t-teşrîfte vakf-ı câi’z-zikre li ecli’t-tescîl ve’t-tekmil (…) ta‘yîn olunan İsmail Efendi b. Rüstem mahzarında bi’l-vekâle ikrâr ve takrîr-i kelâm edip müvekkilim mûmâ-ileyh es-Seyyid Mehmed Efendi Vakfı sudûruna değin silk-i mülk-i sahîhinde münselik emlâkinden mahalle-i mezbûrede vâki‘ bir tarafı karındaşı es-Seyyid Musli Çelebi mülkü ve bir tarafı Kayyum İbrahim Çelebi olduğu vakıf menzili ve ba‘zan Saliha Hâtun mülkü ve bir tarafı Hüseyin Ağa mülkü ve ba‘zan Hümâ Hâtun Vakfı ve bir tarafı tarîk-i âm ile …? fevkānî ve iki tahtânî oda ve fırın ve su kuyusu ve zât-ı eşcâr-ı müsmire ve gayr-ı müsmire bahçe ve kenîfi müştemil mülk …? tevâbi‘ ve levâhıkıyla hasbeten lillâhi’s-samed vakf-ı sahîh-i müebbed ve habs-i sarîh-i muhalled ile vakf ve habs edip süknâsını kendi …? kendiye …? ba‘de vefâtihî kayınanası Şahbaz bt. Abdullah’a, ba‘dehâ zevcesi Ayşe bt. Mehmed’e, ba‘dehâ mezbûre Ayşe’nin karındaşı Şeyh Ahmed’e, ba‘dehû üvey kız karındaşı Fâtıma’ya ba‘dehâ Koca Kasım Paşa Câmi‘i müezzinlerinden muhtâc-ı süknâ olana rûhu için beher yevm üçer İhlâs-ı şerîf ve birer Fâtiha-i şerîfe tilâvet edip sevâbını rûhuna hibe etmek üzre şart ve ta‘yîn ve menzil-i mahdûd-ı mezkûr mütevellî-i mezbûra teslîm, ol dahi vakfiyet üzre kabz ve tesellüm eyledikde gıbbe’t-tasdîki’ş-şer‘î vekîl-i mezbûr semt-i vifâkdan cânib-i şikāka âzim olup vakf-ı akār İmâm-ı Muhtâr Ebû Hanîfe-i Kûfî Numan b. Sâbit hazretleri katında gayr-ı lâzımdır belki vâkıf, menâfi‘-i vakfı kendi nefsine şart edicek İmâm Muhammed b. Hasan eş-Şeybânî katında vakıf sahîh ve câ’iz olmaz binâen alâ zâlik vakf-ı mezbûrdan bi’l-vekâle rücû‘ eyledim mütevellî-i mezbûrun kasr-ı yedine tenbîh olunmak müvekkil-i mezbûrdan matlûbumdur deyicek mütevellî-i mezbûr cevâb-ı bâ-savâba mütesaddî olup fi’l-vâki‘ hâl bast olunan minvâl üzredir lâkin tilmîz-i evvel İmâm Ebû Yusuf Hazretleri katında sıhhat lüzûmdan müfârık olmayıp vâkıfın mücerred vekaftü kavliyle vakf-ı sahîh lâzım olup ve şart-ı mezkûr dahi İmâm-ı ma‘hûd -aleyhi rahmeti’l-Meliki’l-Vedûd- katında sahîh ve nâfizdir deyû teslîmden imtinâ‘ ve sadr-ı kitâb-ı tevkî‘-i müstetâbi ile şeref-yâb hâkim u hâsim huzûrunda müterâfi‘ân ve her biri faslu hasme tâlibân olduklarında hâkim-i müşârun-ileyh tarafeynin kelâmına nazar ve mübtil-i hayr olmakdan hazer edip fikr-i dakīk ile ba‘de’t-tefekkür cânib-i vakfı evlâ görüp âlimen bi’l-hilâfi’l-cârî beyne’l-eimme ve’l-eslâf vakf-ı mezbûrun sıhhat ve lüzûmuna alâ kavli men yerâhu hükm-i sahîh-i şer‘î ve kazâ-i mer‘î ile hükm-i kazâ etmeğin min ba‘d naks ve nakza mecâl muhâl ve tağyîr ve tebdîli mümteni‘ü’l-ihtimâl olmuşdur. (…) sene 1081. Şuhûdü’l-hâl: Abdi Beşe, Mehmed Çelebi b. Şaban, Mehmed b. Ahmed, Mustafa Çelebi b. Mehmed, Salih Efendi b. Hasan, Mehmed Efendi, Hasan b. Ali.