Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 319 Hüküm no: 360 Orijinal metin no: [49a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Bey b. Hüseyin’in doru katır bahasından Manolaki v. Petro’dan alacaklı olduğu Mahmiye-i İstanbul’da Aşçıbaşı mahallesi sükkânından râfi‘ü’l-kitâb Ahmed Bey b. Hüseyin nâm kimesne meclis-i şer‘-i şerîfde Manolaki v. Petro nâm zimmî muvâcehesinde üzerine da‘vâ ve takrîr-i kelâm edip bundan akdem mezbûr Manolaki bana bir kimesneden iki kîse akçe alıvericek olmağla otuz guruş kıymetli bir re’s doru katırı hizmetkârım Veli yediyle bi tar[îk]i’r-rüşve mezbûr Manolaki’ye teslîm ol dahi vech-i muharrer üzre ahz ve istihlâk etmekle suâl olunup kıymet-i şer‘iyyesi olan otuz guruşun mezbûr Manolaki’den alıverilmesi matlûbumdur dedikde, gıbbe’s-suâl mezbûr Manolaki vech-i muharrer üzre müdde‘î-i mezbûrun hizmetkârı Veli yedinden kabz ve istihlâk ettiği katırın kıymeti ancak beş guruş idi deyip ziyânı inkâr edicek müdde‘î-i mezbûrdan ziyânı için beyyine taleb olundukda mahalle-i mezbûre sükkânından Osman b. Abdullah ve Ali Bey b. Mehmed nâm kimesneler li ecli’ş-şehâdeti meclis-i şer‘a hâzırân olup istişhâd olunduklarında fi’l-hakīka müdde‘î-i mezbûrun vech-i muharrer üzre hizmetkârı Veli yediyle bi tarîki’r-rüşve mezbûr Manolaki’ye teslîm eylediği bir re’s doru katırın kıymeti otuz guruşdur, biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri makbûle olmağın mûcebince zikr olunan katırın kıymeti olan otuz guruşu müdde‘î-i mezbûra edâya mezbûr Manolaki’ye ba‘de’t-tenbîh mâ vaka‘a bi’t-taleb ketb olundu. Fî selh-i Cemâziyelâhir li sene seb‘a ve seb‘în ve elf. Şuhûdü’l-hâl: Derviş Çavuş b. Mustafa el-Mübâşir, Cafer b. Abdullah, Mustafa b. Oruc, Hasan Bey b. Abdullah Çukadâr ve gayruhüm mine’l-huzzâr.